Selekshon Intermediate den final internashonal awe 4’or kontra di Asia Pacific

Selekshon Intermediate den final internashonal awe 4’or kontra di Asia Pacific

WILLEMSTAD- Selekshon Intermediate di Liga Pabou di Kòrsou, kampion Latino Americano di Intermediate lo hunga final internashonal djasabra 3 di ougùstùs pa 4’or pm kontra di Asia Pacific. Djarason 31 di yüli nos selekshon a gana di Asia Pacific pa klasifiká pa final internashonal. Promé ku e wega ei nos a gana Puerto Rico 10 pa 4 dia 29 di yüli.  Dia 1 di ougùstùs Asia Pacific a gana di Puerto Rico 2 pa 1.

‍

‍

SELEKSHON

Selekshon Intermediate League Pabou na Livermore pa Kampionato Mundial ku presensia di RBC Royal Bank

WILLEMSTAD - Djarason 24 di yüli 2024 den oranan di mèrdia e selekshon di Intermediate League  League Liga Pabou a biaha pa Livermore (California),  pa partisipá den e Kampionato Mundial di Beisbòl Intermediate League.  E kampionato a start dia 28 di yüli i lo terminá dia 4 di ougùstùs 2024. Selekshon Intermediate a bira kampion di Latino America fin di yüni 2024 na Republica Dominicana. RBC Royal Bank tabata presente atrobe pa duna e selekshon sostén i deseá e delegashon  éksito. E siguiente hungadónan a biaha ku e selekshon: Jaydlynn Wiel, Joshua Rojer, Alexander Provacia Roach, Shemar Sophia Jacobus, Nathan Nahr, Yeadon Lourens, Juan Ramon Cleto Ferreras, Sean Serverie, Helmir Helmijr, Jerome Basilia, Nazir El Ossais, Dshawn Winklaar i Joshua Acosta Fernandez. Manager di e selekshon ta Sherrintley Da Costa Gomez asistí pa téknikonan Sorick Liberia i Argenis Martina.  Sr. Sherton Saturnino ta hefe di delegashon asistí pa Urny Nahr.

‍

Isla Crackers ta kibra invikto di Quality Stars den Beisbòl Veterano

WILLEMSTAD- Isla Crackers ku picheo kombiná di Dayron ‘Boggy’ Puriel i Roderick Eustatia a gana Quality Stars ku skor di 3-2 i kibra invikto di Quality Stars den e kampionato 2024. Quality Stars tabata invikto henter e kampionato 2023. Dayron ‘Boggy’ Puriel èks Quality Stars ku e aña aki a bai Isla Crackers a tira 4 inning i dos tersio i Roderick Eustatia a relevá i tira dos tersio di inning pa terminá e partido. Quality Stars tabatin chèns di laga Isla Crackers den tereno, pero ku base yen i un out Luisgardo Alvarez a konektá un rolling pa segunda ku e resultá den un double play pa terminá e partido.  Den e otro weganan di wikènt ekipo Broncos a gana Jandoret Raiders 5 pa 3 djasabra. Den e otro wega di djasabra ekipo Santa Maria ku picheo tremendo di Evenon Martis a gana Santa Rosa ku skor di 6 pa 2.  Djadumingu ekipo Azucar a kai vensí ku skor di 6-1 kontra di Marlins.  Shannon Kleinmoedig a tira wega kompletu pa Marlins pa bira e picher ganadó.   Den Liga 50 ekipo Santa Rosa Royal a debutá ku viktoria riba Energy ku picheo di Edmond ’Momon’  Martina.  E wega entre ekipo Sigi Hunga i Otrabanda no a tuma lugá.

Nos Tambe Por ta blankia Los Amigos
WILLEMSTAD- Nos Tambe Por a blankia Los Amigos djadumingu atardi den Liga 60 na Frank Curiel Ballpark. Siegfried Lopez a tira wega kompletu i Winston Kirindongo a bati di 3-3 pa Nos Tambe Por blankia Los Amigos 6-0. Junny Provence a habri pa ekipo Nos Tambe Por i tira wega kompletu. Siegfried Lopez a tira 5 inning kompletu i permití solamente un hit na ekipo Los Amigos.  E hit tabata di Candido Adamus.  Percey Schoop a bati di 2-2 pa Nos Tambe Por i Ellery Martina a bati un doblete komo emergente.  Den otro weganan ekipo Pitufos a gana Curacao Suepr Stars 4 pa 1. Lions a gana Mon Repos Sluggers 17 pa 1. Herbert Lucas tabatin un grandslam pa Lions i Marlon Louisa tambe a bati un homerun pa Lions.

MAS INFORMASHON DI BEISBÒL I SÒFTBÒL

‍
Fanátikonan di Deporte Kòrsou, bondia. Nos tei atrobe kargá ku informashon di Sòftbòl Slowpitch i Beisbòl. Torneo SKAK  a tuma luga siman pasá a start djaweps i terminá djadumingu na Van Engelen Ballpark. Bon públiko pa mira e weganan durante e wikènt ku a pasa. Final den e kategoría tabata 40+ Flow / Selikor kontra di CRU den oranan di mèrdia. CRU a gana ku skor di 4-3 i bira kampion, Ekipo SDKK/GGZ/Damen a terminá na di 3 lugá den e kategoría 40+. Ekiponan Brandweer a hunga kontra di WEB (Boneiru) i Corendon lo hunga kontra Taxi Drivers (Aruba) den semi-final di e hóbennan djadumingu den oranan di mainta.  Weganan di semi-final ta 11’or i 12’or. Final lo ta 4’or di atardi.  WEB a bira kampion ganando di Corendon 5-2.

* * * * *

Den Liga di Nos Tur ekipo Un Kara a kibra invikto di ekipo Sin Stres ganando ku skor di 8-4. Djabièrnè e ekipo Un Kara a kai vensí kontra di Shining Stars. Den Liga 50 ekipo Jaws a gana di Sluggers den e úniko wega di Liga 50 ku a tuma lugá djasabra na Van Engelen Ballpark. Tabatin e torneo SKAK + i a laga espasio pa nèt un wega di 50+. Miéntras tantu trahando e kolumna aki nos a risibí e notisia ku ekipo WEB Boneiru a klasifiká pa final di Torneo SKAK ganando e ekipo Brandweer ku skor di 1-0. Un pa nada den Sòftbòl di pone bala, pero asina mes. Einan bo ta mira kiko ta nifiká tira e bala riba skina ora bo ta picha. Un wega inkreíbel ku masha hopi hungadó di nivel masha haltu mes ta kaba solamente 1-0 kaminda e picheo ta pone bala.

* * * * *

Pa loke ta trata Beisbòl Veterano, Evenon Martis a presentá den gran forma pa ekipo Santa Maria Pirates gana Santa Rosa Memories ku skor di 6-2 den Beisbòl Veterano 40+ djasabra na Vi Jansen Ballpark. Evenon Martis a tira wega kompletu, tuma 5 hit i duna 5 base por bola pa gana e wega. E dos karedanan di Santa Rosa Memories tabata karedanan sushi.  Ramses Jamanika tambe a picha wega kompletu i ela tuma 6 kareda, tur limpi ku 7 hit kontra. Santa Maria Pirates su bateo tabata basta oportuno den e wega menshoná. Jandoret Raiders a kai vensí kontra di Broncos 5-3. E wega tabata empatá den último inning i Broncos komo ekipo di bishita a nota dos kareda i Jandoret komo ekipo di kas no a logra nota den nan último chèns.

* * * * *

Kòrsou tin selekshon Minor na kampionato Latino Americano na Puerto Rico (Mayaguez) i selekshon intermediate na Mundial na Livermore. Minor a pèrdè nan promé wega ku skor di 4-1 kontra di Venezuela i mester a hunga kontra Honduras djadumingu 1’or (Nos a gana 4-2). Selekshon Intermediate lo hunga nan promé wega djaluna 12’or pm kontra e ganadó di Canada/Puerto Rico. Intermediate tin un tremendo selekshon ku hopi chèns di bira kampion Mundial. Tin vários hungadó ku a bai Williamsport na 2022 i 2023 den e selekshon aki.  Lastimamente nan a kai afo despues ku Nicaragua a gana di Panama den un wega straño. Nos a kai nèt afo pa diferensia di kareda i no por a klasifiká komo mihó number 2.

* * * * *

Beisbòl Dòbel A a sigi ku varios wega den wikènt. Djasabra anochi ekipo Royal Scorpions a gana Santa Maria den un tremendo enkuentro.  E standing despues di e weganan di djasabra tabata Royal Scorpions 10-3, Santa Maria 9-4, Wild Cats 7-5, Santa Rosa Indians 6-6, Groot Kwartier 4-8 i Marchena Braves 1-11. Djadumingu tabatin wega entre Groot Kwartier kontra Wild Cats 3’or i anochi 7’or tabatin wega entre Santa Rosa Indians i Marchena Braves. E asuntu di umpire pa weganan ta keda pèrtá. Den Beisbòl Veterano tin dos kuerpo di umpire ta dirigí e weganan.

* * * * *

Djasabra último no tabatin wega di Liga Amstel na Van Engelen Ballpark. E siman promé tabatin resultado i nos a keda pendiente. Village Softball Tournament a sigi den Stadion Post 6 wikènt pasá. Un torneo masha grandi mes ku ta konta ku partisipashon di varios ekipo popular di Sòftbòl na Kòrsou. Pa loke ta trata e parti di animashon lo tin agrupashon GRIK, Oriri i Dolce. Tin DJ Quillan, DJ Ramil i DJ Krokzz.  E torneo ta kue forsa e siman aki i wikènt benidero ta e gran final den Stadion Post 6. Nos ta keda te aki pa awe. Te mayan ku Poder di Dios.

‍