RBC Royal Bank presente na aeropuerto
Selekshon Junior League Pariba a sali pa Nicaragua pa Kampionato Latino Americano
WILLEMSTAD - Djarason, 3 di yüli 2024 den oranan di mèrdia e selekshon di Junior League Liga Pariba a biaha pa Nicaragua (Managua) pa partisipá na e Kampionato Latino-Americano di Beisbòl Junior League.
E kampionato di hóbennan lo start dia 5 yüli i lo terminá dia 14 di yüli 2024.
RBC Royal Bank manera ta e kaso ku tur selekshon tabata presente pa duna e selekshon sostén i deseá e delegashon éksito.
E siguiente hungadónan a biaha ku e selekshon: Dishairo Antersyn, Jonathan Bonifacio, Zion Cijntje, Michelangel Cordilia, Jayden Elizabeth, Nazhyr Hart Martina, Jesus Alerto Hidalgo Pinto, Dwayne Isenia, Jayden Martina, Railipo Martina, Raishelnon Ogenia, Jayniel Oniel, Rjeau Valks i Randall Victoria.
Manager di e selekshon ta Ludwin Obispo, asistí pa téknikonan Gishairo Jansen i Christian Vilchez.
Sr. Juvenal Leonora ta hefe di delegashon asistí pa sr. Ernst Meyer.
Sr. Sendley Martina ta e umpire ku Kòrsou lo manda pa e kampionato Junior na Nicaragua.
Santa Maria a dal Yesterday 8-1 i ta keda invikto
WILLEMSTAD - Santa Maria Pirates ku bon picheo atrobe di Evenon Martis a dal Yesterday ku skor di 8-1. Santa Maria Pirates ta keda invikto den e kampionato di Beisbòl Veterano 40+ i lo topa ku Quality Stars ku tambe ta invikto djadumingu awor pa 3.30 pm na Vi Jansen Ballpark. Santa Maria Pirates i Quality Stars ta úniko ekiponan invikto den Beisbòl Veterano. Den otro weganan di wikènt pasa Santa Rosa a nòkout Broncos 10-0, Isla a gana Jandoret 7 pa 2 i Otrabanda dal Azucar 9 pa 4. Standing di Beisbòl Veterano ta Quality Stars 6-0, Santa Maria 5-0, Isla Crackers 5-1, Santa Rosa 4-1, Yesterday 3-2, Otrabanda Veterano 3-2, Marlins 2-4, Broncos 1-3, Jandoret 1-5, Azucar 0-6.
Santa Maria Pirates 8, Yesterday 1
Santa Maria Pirates a dal 13 hit i kometé 3 eror. Evenon Martis tabata e picher ganadó i Jason Naaldijk a bati di 2-2.
Yesterday a bati 6 hit i hasi 3 eror. Harvin Hart a bati di 2-2 i Pernell Sprot tabata e picher pèrdèdó.
Isla Crackers 7, Jandoret Raiders 2
Isla Cracker a dal 10 hit i hasi 1 eror. Roderick Eustatia tabata e picher ganadó. Rodney Riley a bati di 2-2, Dayron Puriel di 3-2.
Jandoret Raiders a bati 2 hit i kometé 1 eror. Clifton Ijziek tabata e picher pèrdèdó. Sherdon Rombley i Chervin Maduro a bati di 2-1.
Santa Rosa Memories 10, Broncos 0
Santa Rosa a dal 5 hit i no a kometé eror. Verney Jansen tabata e picher ganadó. Wilfred Reinita a bati di 2-2, Signald Paz di 1-1.
Broncos a dal 3 hit i hasi 2 eror. Raily Cordilia tabata e picher pèrdèdó. Minald Seferina, Jarl Henriquez i Ramses Elisabeth a bati di 2-1.
Otrabanda Veterano 9, Azucar 4
Otrabanda a dal 11 hit i hasi 2 eror. Edison Clemencia tabata e picher ganadó. Kenneth Desbarida a bati di 3-3, Winston Kirindong di 2-2, Winsley Ansano a konekta un homerun.
Azucar a bati 5 hit i kometé 2 eror. Fhurgion Booy tabata e picher pèrdèdó. Reinaldo Elcock a bati di 3-2.
MAS INFORMASHON DI BEISBÒ I SÒFTBÒL
Lesadónan di Deporte Kòrsou bondia. Djarason selekshon Junior di Liga Pariba a sali pa Nicaragua (Managua) pa kompetí den e kampionato Latino Americano di Junior League. E kampionato ta start dia 5 i terminá 14 di yüli. Na Kòrsou dia 14 di yüli tur delegashon lo tei pa e kampionato di Karibe di Little League, i e apertura ofishal lo ta djaluna, 15 di yüli den Stadion Post 6.
• * * * *
Nos a risibí resultadonan di Beisbòl Veterano. Ekiponan Quality Stars i Santa Maria Pirates ta sigi invikto i nan o topa ku otro djadumingu awor na Vi Jansen Ballpark. Ta e ekiponan ku a bira kampion ultimo añanan Quality Stars a bira kampion na 2020 2022 i 2023, Santa Maria a bira kampion na 2019 i 2021. Jandoret Raiders tabata komandá Beisbòl Veterano di 2014 te ku 2018 ku 5 título sigi. En todo kaso nos ta topa djadumingu awor pa wega entre Qualiy Stars i Santa Maria Pirates.
• * * * *
Liga Amstel i Liga Van Engelen a stop di drei den 2024. Nada pa e hobennan por kompetí, ta solamente Sòftbòl Soshal i komersial tin pa nan move. Tin ekiponan grandi manera Swift, Jaws, Navegantes, pará ketu. Ekiponan ku tin entre 45 pa 50 aña di eksistensia. Den Liga Amstel tin grandinan manera Cicoza, Terremoto, Thrillers ets. Ekiponan grandi ku ta pendiente pa wak kiko ta bai pasa. Swift, Terremoto i Cicoza ta kompeti den kopa ABC&S, pero otronan kasi a pasa pa historia.
• * * * * *
Tin moveshon parse pa bini ku Sòftbòl Maskulino Fastpitch bèk, sea riba djasabra na Van Engelen Ballpark of na Sam Bunting of Buena Vista riba fechanan ku no tin Beisbòl Dobel A. Mester hasi algu si pa e hobennan por hunga algu di Sòftbòl. Torneonan di Soshal Maskulino Open i Spshal Maskulino Corporrate ta tumando luga unu tras di otro. Tin torneo SKAK, Torneo na Post 6. Wikènt pasá tabatin Torneo organisá pa The New Radiator. Hungadónan kuminsa train e fastpitch debí ku ta parse ku lo bai tin moveshon.
%20copy.jpg)
• * * * * *
Preparashonan ta sigi pa kampionato di Karibe di Little League ku lo tuma lugá na Kòrsou di 14 pa 21 di yüli. Delegashonnan ta yega dianan 13 i 14. Djaluna 15 di yúli lo tin e apertura ofishal ku lo tuma 4 den Stadion Post 6 naturalmente. Probablemente lo hunga den pul di 3 ekipo kaminda kada ekipo lo topa otro dos biaha hungando 4 wega. Tin posibilidat pa hunga eliminashon dóbel tambe. Playoff semi-final lo ta djabièrnè 19 yüli i final djasabra 20 di yüli. Ganadó di e kampionato di Karibe aki lo representá e region aki na Williamsport di 14 pa 23 di ougùstùs. Kórsou pendiente pa representá Karibe pa di 4 aña sigi.
• * * * *
Siman pasa Extra Inning a risibi e tristu notisia ku Eithel Isebia, hòmber grandi di Cicoza, tata di Ryan Isebia a bai sosega. Un dje grandinan di Slowpitch di Kòrsou, eks funshonario haltu di Gobièrnu, eks parlamentario di teritorio insular di Korsou, gran narado i komentarista di Beisbol muy enespeshal di Little League. Sóftból Slowpitch i Cicoza ta di luto. Akto di entiero lo tuma luga djabièrnè awor. Kondolensia ta di 9’or pa 11’or di mainta. Forsa na Ryan Isebia i demas famia, ekipo Cicoza tambe naturalmente. Nos a risibí notisia tambe siman pasá ku Edward Martier eks hungadó di SDKK (Prison) i di Swift a bai sosega. Forsa na famia, amigu i konosinan.
• * * * * *
Liga 50 ta sigi kandela djasabra awor ku wega entre Ban Serio i Baranka, ekiponan ku a terminá kampion i sup kampion di kampionato 2024. Ban Serio un tempu tabata super kampion i Baranka tabata na kaminda pa bira un dinastia ganando Liga 50 na 2021 i 2022. Ban Serio a kita e titulo na 2023 ganando Baranka mes den final di 2023. E wega entre Baranka i Ban Serio lo ta 10’or i e otro weganan ta 12’or Flamboyan- Pitufos, 2’or Lions- Catpower, 4’or Artemisia -Jaws. Standing den Liga 50, Baranka 6-0, Marlins 5-2, Pitufos 5-2, Ban Serio 4-3, Jaws 3-3, Artemisia 3-4, Sluggers 2-4, Flamboyan 2-4, Catpower 1-5, Lions 1-5. Awe nos tin resultadonan di Beisbol Veterano. Djadumingu awor ta Santa Maria Pirates kontra Quality Stars, dos ekipo invikto. Te mayan ku Poder di Dios.
