Selekshon Minor League Pabou na Puerto Rico i tin rèkòrt di 1-1 i lo topa ku Aruba djamars 9.30
WILLEMSTAD- Selekshon Minor League Pabou na Puerto Rico i tin rèkòrt di 1-1 i lo topa ku Aruba djamars 9.30 am. Ganadó di e wega aki lo pasa pa semi-final. Selekshon Minor a yega Puerto Rico djabièrnè i a hunga kontra Puerto Rico djasabra i gana 8-7. Djadumingu selekshon di Kòrsou a pèrdè 9-0 kontra Republica Dominicana. Nos tin relato di e biahe e detaye di e delegashon.
*** Por sigi e weganan via Facebook Municipio Mayaguez ***
Djabièrnè, 21 di yüli 2023 den oranan di mèrdia e selekshon di Minor League Liga Pabou a biaha pa Puerto Rico (Mayaguez), pa partisipá den e Kampionato Latino Americano di Beisbòl Minor League. E kampionato di hóbennan lo start dia 21 yüli i lo terminá dia 30 di yüli 2023.
RBC Royal Bank manera ta e kaso ku tur selekshon, tabata presente pa duna e selekshon sostén i deseá e delegashon éksito.
E siguiente hungadónan a biaha ku e selekshon: Xayvian Williams, Ragian Raap, Na-J Nahr, Jeffrey Lee Delice Cafsia, Shadi El Ayoubi Diaz, Jaydion Royer, Rashedean Ellis, Raygen Raphaela, Jo-Zaindy Balentina Schmidt, Hjahmir Helmijr, Janderick Martina, Tyrese Martha, Dlisson Fraay i Rashendrick Ignacia Romano.
Manager di e selekshon ta Sorick Liberia asistí pa téknikonan Urny Nahr i Ariyen Mogen.
Sr. Eran Neuman ta hefe di delegashon asistí pa sra. Lorraine Wilmans Hariquez.
Eugene De Haak ta e empayer ku ta biaha pa Puerto Rico ku e delegashon.
*** Por sigi e weganan via Facebook Municipio Mayaguez ***
Selekshon di Kòrsou Pabou lo representá Latino Americano di 13 pa 20 di ougùstùs na Taylor Michigan. Selekshon Senior lo ta di 29 di yüli pa 5 di ougùstùs pa Easley Michigan. Selekshon di Kòrsou Little lo ta di 16 pa 27 di ougùstùs na Williamsport, Pensilvania. Miéntras tantu selekshon Minor a sali djabièrnè pasá pa Mayaguez Puerto Rico, pa kompetí den e kampionato Latino Americano di Minor ku ta edatnan 9 i 10 aña. Extra inning tabata na aeropuerto pa deseá e delegashon bon biahé i suerte den e kompetensia.
* * * * *
Un públiko grandísimo tabatin na Tio Daou Ballpark pa mira e gran final djasabra. Un ora promé ku e wega start, Tio Daou Ballpark tabata yen. Dia selekshon di Reino di Antia a hunga final na 2005, nos ta kòrda tabatin tantu hende asina den Tio Daou Ballpark. E idea di minister di deporte sr. Sithree van Heydoorn pa laga e públiko drenta pornada i despues riba e fecha final pone un pantaya grandi, a resultá tremendo. Na entrega di premio tabatin tres minister di Gabinete Pisas II. Tabata presente sr. Gilmar Pisas, sr. Sithree van Heydoorn i sr. Rusiandro Cijntje. Panama a gana di Venezuela i sali number 3 di e torneo. E ekiponan Panama i Venezuela ku tabata fuertísimo den e buelta preleminatorio a logra bai final i a pèrdè pa nòkout den semi-final. Venezuela a resultá ekipo mas disipliná, pero no tabata presente pa risibí e premio.
%20copy.jpg)
* * * * *
Beisbòl Dòbel A a sigi djadumingu ku dos wega na Tio Daou Ballpark. Den e promé wega sorpresa grandi a kai kaminda ekipo Marchena Braves a gana di Santa Maria Pirates ku skor di 14 -11. Marchena ta e ekipo den sֶótano ku rekòrt di 3-7, miéntras Santa Maria ta number 4 ku rekòrt di 6-7. E di dos wega di djadumingu tabata Santa Rosa i Royal Scorpions, wega kandela ruman. Standing promé ku e wega number 2 di djadumingu tabata Santa Rosa Indians 9-2, Royal Scorpions 7-4, Wild Cats 7-5, Santa Maria Pirates 6-7, Groot Kwartier 3-8 i Marchena Braves 3-9.
* * * * *
Liga 50, Liga 60, Liga di Nos Tur i Beisbòl Veterano a sigi den wikènt ku varios wega na e parkenan. Den Liga 50 ekipo Marlins mester a lucha pa gana Catpower 12-7. Ban Serio a blackout Artemisia 22-3, Jaws a dal Sluggers basta duru ku skor di 14-6. Baranka a nòkout Lions ku skor 14-4. Pa loke ta trata Liga 60, ekipo Nos Power a gana Lions 5-1, Los Amigos a gana Mon Repos Sluggers pèrtá ku skor di 4 pa 3. Jaws a nota 3 kareda den nan último chèns pa laga Pitufos den tereno ku skor di 5-3. Despues di eror ku mester tabata out number 3, Fransje Lambertina a konektá homerun di 3 kareda pa bòltu skor i laga Pitufos den tereno. Den kurso di siman nos tin mas detaye di e otro liganan.
