Selekshon Pabou Junior kampion Latino Americano i Kòrsou supkampion na Haarlemse Honkbalweek
CAGUAS- Selekshon di Kòrsou di Liga Pabou Junior a gana selekshon A di Puerto Rico (Selekshon Caguas) ku skor di 6 pa 5 i bira kampion Latino Americano di Junior djabièrnè anochi na Caguas (Puerto Rico). Den oranan di mèrdia riba mesun djabièrnè selekshon di Kòrsou mester a lucha den extra ining pa gana di selekshon di Panama ku skor di 5 pa 4 den semifinal. E selekshon lo regresá Kòrsou djaluna den oranan di mèrdia. Selekshon Kòrsou Junior lo representá Latino America di 14 pa 21 di ougùstùs 2022 na Taylor Michigan den e kampionato Munidal di Junior League. Kòrsou a terminá e kampionato Latino Americano na Caguas invikto ku 6 ganá i 0 pèrdí. Kòrsou a gana 4 wega sigí den e buelta regular pa despues gana semi-final i final djabièrnè 15 di yüli 2022.
KÒRSOU SUPKAMPION NA HULANDA
HAARLEM - Selekshon di Kòrsou a bira sup kampion di Haarlemse Honkbalweek djabièrnè 15 di yüli. Kòrsou a kai vensi ku skor di 6 pa 1 kontra un selekshon di Hulanda karga ku yunan di Kòrsou di fam Schoop, Selassa, Bernadina, Martis, Polonius, Balentien, Profar ets. E eks Big Laguer, picher Shairon Martis tabata hermetiko tumando solamente 2 hit i un kareda pa Hulanda gana i bira kampion. Ku e wega empatá na 0 kareda den di 5 inning, Hulanda ta rèli pa 5 kareda riba entre otro doblete empuhadó di dos kareda di Roger Bernadina pa finalmente bin gana e wega 6-1. Roger Bernadina a bira MVP di e torneo. Juremi Profar di Hulanda a bira kampion bate di e torneo. Selekshon di Kòrsou a gana USA dos biaha sigi, den buelta regular i despues den semi-final pa pasa pa final. Tremendo aktuashon di selekshon di Kòrsou ku ta pendiente pa eliminatorionan Panamericano i World Baseball Classic.
Fanátikonan di Deporte Kòrsou, bon dia i felis wikènt. Djabièrnè Kòrsou tabata di fiesta ku e wega final na Haarlemse Honkbalweek. Na Hulanda nos a sali sup kampion. Final den Latino Junior aya na Puerto Rico. Miéntras tantu selekshon Junior di Sòftbòl a yega Sabana Grande (Puerto Rico) pa partisipá na e kampionato Latino di Junior. Pareu ku e kampionato Junior lo tin e kampionato Senior tambe. Selekshon Senior a sali djaweps mèrdia rumbo pa Sabana Grande. Selekshon Minor Pariba a sali djasabra mèrdia rumbo pa Puerto Rico. Na momentu ku paisnan no por tuma e sedenan, Puerto Rico ta tuma kasi tur e sedenan i nos mester yega Puerto Rico via dos buelo ku ta kosta hopi sèn.
* * * * *
Ban un ratu den Slowpitch. Liganan ta sigi e wikènt aki na parkenan rònt Korsou. Liga di Nos Tur, Liga 50, Liga Amstel, Liga van Engelen, Liga 60 i Beisbòl Veterano. Den Beisbòl Veterano e parti di Liga 50 ta start djadumingu awor. Djasabra tin e weganan ku a keda suspendé dia 24 di aprel pa motibu di awaseru. Weganan di djasabra awor ta 10.00 Vosama – Yesterday, 13.00 The Brothers – Azucar, 15.30 Marlins – Otrabanda. Djadumingu ta weganan di Liga 50. 10.30 Jandoret Raiders vs Sigi Hunga, 13.00 Vosama – Yesterday.
* * * * *
Liga Di Nos Tur, djabièrnè 15 di yüli na Frank Curiel Ballpark. 20.00 Un Kara – Shining Stars, 21.45 Chilling – Join Me. Djasabra 16 di yüli 20.00 Chilling – Join Me, 21.45 Un Kara – Shining Stars. Liga 50 djasabra 16 di yüli na van Engelen Ballpark ta sigi ku 4 wega. 10.00 Catpower – Sluggers, 12.00 Artemisia – Ban Serio, 14.00 Lions – Pitufos, 16.00 Baranka – Flamboyan/Tigers. Jaws tin barwacht i Marlins ta liber. Liga 50 lo terminá promé buelta dia 27 di ougùstùs pa despues parti e ekiponan den dos pul i tur ekipo lo hunga 4 wega mas pa yega na 14 wega. Despues di einan lo bini play-off semi-final. 1 vs 4 i 2 vs 3 seri mihó di 3.
* * * * *
Kòrsou su selekshon di Beisbòl Dòbel A a klasifiká pa final di Haarlemse Honkbalweek. Ta bon pa chèk ku den historia Kòrsou a yega di bai final den Haarlemse Honkbalweek i tampoko World Port Tournament. Nos ta bai chèk esei den dianan benidero. En todo kaso Kòrsou a laga e ekipo di USA den tereno ganando ku skor di 3 pa 2. Despues Hulanda ta logra gana di Hapon ku skor di 2-1, djasabra tabata un final nunka bisto den Haarlemse Honkbalweek. Yunan di Kòrsou bibá na Hulanda ku a mira e kos ta bini a buska nan karchi for di tempran pa nan por a mira e gran final.
* * * * *
Bayendo bek pa e wega di semi-final ku nos a gana USA. E hungadó Riordan ‘Jordi’’ Windster a risibí HIT By pitch (nos a kere tabata base por bola, debí ku tabata riba konteo di 3-0) ku base yen pa Darren Seferina skor e kareda di gana. Kòrsou a skor 3 kareda bati 6 hit i hasi 1 eror. USA a nota 2 kareda, bati 3 hit i hasi 1 eror. USA a laga 15 koredó na base i Korsou 9 koredó na base. Cerilio ‘Boneriano’ Soliana a picha e último inning (den extra inning) pa bira e picher ganadó. Stephan Vidal di 2-1. Remarkabel ta ku e selekshon ta un tim hopi uni mes mes i esei ta resaltá hopi, segun e komentario di e Merikanonan ku ta komentá via You Tube di Haarlemse Honkbalweek. Hulanda a gana Hapon 2-1. Hulanda tabata atras habriendo di 7 inning pèrdí pa un kareda faltando un out pa pèrdè pa no hit no run i a nota dos kareda. E promé tabata notá pa Sharlon ‘Wecho’ Schoop. By the way, nos a drenta den kontakto ku un dje grandinan di tur tempu di Beisbòl di Kòrsou i Antia ku ta Kenneth Gijsbertha ku a konfirmá ku na 1972 selekshon di Antia a terminá number 1 den su pul di Haarlemse Honkbalweek.
* * * * *
Kenneth a manda nos un app di Wikipedia ku algun detaye ku ta indiká ku no tabatin final. Antia Hulandes a sali number 1 den nan pul i Cuba number 1 den nan pul. En todo kaso Korsou sup kampion na Hulanda i Junior Pabou kampion na Puerto Rico.
