RBC Royal Bank presente na aeropuerto
Selekshon Senior League Pabou a sali pa Puerto Rico pa Kampionato di Karibe
WILLEMSTAD- Djabièrnè, 21 di yüni 2024 den oranan di mèrdia, e selekshon di Senior League Liga Pabou a biaha pa Puerto Rico (Mayaguez), pa partisipá den e Kampionato di Karibe di Beisbòl Senior League. E kampionato di hóbennan lo start dia 21 yüni i lo terminá dia 30 yüni 2024.
RBC Royal Bank manera ta e kaso ku tur selekshon, tabata presente pa duna e selekshon sostén i deseá e delegashon éksito. RBC Royal Bank, manera ya a bira un tradishon pa 24 aña kaba, ta spònser unifòrm i kubri gran parti di e biahe. RBC Royal Bank ta spònser number 1 di Little League ya pa 24 aña. Sr. Sharier Dorand branch manager di RBC tabata presente na airport pa papia ku e delegashon i deseá nan éksito.
E siguiente hungadónan a biaha ku e selekshon: Day-Jendrick Anita, Farid Cijntje, Sherrintley Da Costa Gomez Jr., Derickson Doran, Ewald Hersilia, Gilventon Josephina, Keaden Kuwas, Izion Mogen, Arsheneau Martina, Timothy Mogen, Victor Nieves Mack, Reegan Randt Kirindongo, Jurving Roojer, Zazil Schoop, Jaeden Sille i Darren Wilson,
Manager di e selekshon ta Quincy Virginie, asistí pa téknikonan Erwin Benita i Charles Merite. Sr. Rylandrew Schoop ta hefe di delegashon asistí pa Kursley Kuwas. Sr. Carol de Palm Jr. ta e umpire ku Kòrsou lo manda pa e kampionato Senior pa Puerto Rico.
RBC a entregá unifòrm na selekshonnan di Little League di Kòrsou na Frank Curiel Ballpark
WILLEMSTAD- RBC Royal Bank N.V. (‘RBC’), spònser di Curacao Little League Baseball, djárason dia 12 di yüni 2024 a hasi entregá di unifòrm na selekshonnan di Little League di Kòrsou, ku lo hunga den e kampionatonan di region Karibe i Latinoamerikano. Tambe a entregá unifòrm na e dos selekshonnan Little League di Kòrsou, selekshon di Pariba i di Pabou ku lo representá Kòrsou den e kampionato di Karibe di Little League ku lo tuma lugá na Kòrsou di 14 pa 21 di yüli 2024.
%20copy.jpg)
RBC a entregá unifòrm simbólikamente na selekshon Minor, Little, Intermediate i Senior di Liga Pabou, i na Liga Pariba na selekshonnan Little i Junior. E entrega ku ta un kantidat di mas di 125 unifòrm a tuma lugá na Frank Curiel Ballpark. Di parti di RBC, spònser prinsipal ya pa 24 aña, a hiba palabra señor Pierrot Hurtado Managing Director di RBC i District Administrator señor Urny Florán. Manera ta e kaso di último añanan e entrega di unifòrm ta tuma lugá dilanti tur delegashon, esta hungadó di tur selekshonnan di liganan menshoná i nan dirigentenan.
Tambe presente tabata RBC su Senior Vice President and Head Caribbean Banking, señor Chris Duggan. Duggan ta hefe nobo ku ta lidera RBC su operashonnan ront Karibe i tabata bishita RBC na Kòrsou pa prome biaha. E presensia di Duggan na e entrega simbóliko di unifòrm ta konfirmá kon importante e banko ta konsiderá nan sponsorship pa nos hóbennan i na Curacao Little League.
Durante su diskurso Pierrot Hurtado a enfoká riba e importansia di nos Hubentut pa ku futuro di Kòrsou i ku RBC lo sigui yuda den desaroyo di hóbennan na Kòrsou. Pierrot Hurtado a deseá nos selekshonnan éksito na Kòrsou i éksito tambe na esnan ku lo kompetí den eksterior.
RBC lo ta presente na apertura i durante weganan di e kampionato di Karibe di Little League League pa apoyá nos hóbennan di 11 pa 12 aña. E kampionato di Little League lo tuma lugá den Stadion Post 6 di 14 pa 21 di yüli 2024.
Na momentu ku e selekshonnan ta biaha, RBC lo tei na aeropuerto pa yama nos hóbennan ayó i deseá nan suerte den e diferente torneonan.
Pierrot “Manera ta e kaso tur aña atrobe RBC ta kubri gastunan relashoná ku biahenan di selekshon i representashon den eksterior, unifòrm pa selekshon, gastunan di kampionato, material, training pa coach i dirigentenan tékniko. Tambe RBC ta kubri gastunan di seminario i workshop organisá pa direktiva di liganan di Little League. E aña aki selekshonnan ku ta representá nos país den kampionatonan regional lo sali for di fin di yüni pa eksterior. E biahenan aki ta sigurá for di dia RBC a kuminsá spònser Little League 24 aña pasa. RBC ta hopi kontentu di por kontribuí na formashon di hóbennan di Little League. RBC ku tin mesun filosofia ku Little League, esta formashon di hóbennan ku ta pilanan di desaroyo i futuro di Kòrsou lo sigui kontribuí hasiendo lo máksimo pa un mihó Kòrsou i otro islanan di Dutch Caribbean ku tambe ta di spònser pa RBC den e deporte Little League.
RBC ta kere den desaroyo di hubentut i ta konvensí ku e sponsorship lo aportá na mihó prestashon di e hóbennan di e divishonnan den torneonan internashonal i mas importante forma e hóbennan pa den futuro nan ta un siudadano ehemplar i lidernan den e komunidat aki.
Urny Florán a gradisí RBC atrobe pa e aporte na Little League, den e kaso aki unifòrmnan ku kalidat haltu i hopi bunita pa nos selekshonnan. Manera ta konosí RBC ta spònser biahe i unifòrm tambe di delegashonnan di Beisbòl Little League, ku lo biaha pa eksterior. Nos pelotero- i e coachnan ta bon prepará i naturalmente lo ta bon bistí pa representá Kòrsou dignamente aki na Kòrsou i e otro selekshonnan ku lo biaha pronto pa eksterior.
