Serinan di play-off di The Diamond Stars League a empatá i ekiponan veterano maskulino a move pa eksterior djarason
WILLEMSTAD- E dos serinan di play-off di The Diamond Stars League a empatá wikènt pasá. E seri entre number 1 Rising Phoenix i number 2 Nos Goso, a keda empatá na un wega. E otro seri entre number 3, Treasure i number 4 The Fighters tambe a keda empatá. Rising Phoenix a gana Nos Goso 5 pa 4 djabièrnè i Nos Goso a gana Rising Phoenix 4 pa 3 djasabra. The Fighters a sorprendé Treasure ganando 4 pa 3 djabièrnè i djasabra Treasure a gana 6 pa 4. Varios ekipo di Sòftbòl Maskulino Slowpitch 50+ i 60+ a move pa Boneiru.
RESULTADONAN
Djabièrnè 12 di mei
The Fighters 4, Treasure New Era 3
The Fighters tabatin 7 hit ku 4 eror, Sevilla Martina a gana i Celeste Francisca a bai di 1-1. Juglion Winklaar a bai di 2-1. Brunette Robert ku Valerie Cristina, ámbos di 3-2. Pa Treasure New Era 7 hit ku 2 eror. Anuska Delando a pèrdè. Anuska Delando, Suyenne Otto-Apostel, Gesiene Kerindongo ku Sulena Lacruz, tur a bati di 2-1. Tanusi Delando a bai di 2-2. Celeste Francisca a konektá 1 homerun.
Rising Phoenix 5, Nos Goso 4
Rising Phoenix a bati 7 hit i kometé 5 eror. Marie Windster tabata ganadٕó. Sulivien Martina a bai di 2-1 1 i Marie Windster di 2-2. Sue Mouricio ku Joudiunay Wederfoort, ámbos a bai di 3-2. Nos Goso tabatin 10 hit ku 3 eror. Carlientje Cleopa a resultá pèrdèdó. Milady Pereira a bai di 1-1 i Emmely Jonis di 2-1. Fayna de Mey ku Solange Ostiana, ámbos di 3-2.
Djasabra 13 di mei
Nos Goso 4, Rising Phoenix 3
Nos Goso tabatin 7 hit ku 4 eror. Carlientje Cleopa a bai ku e viktoria. Charelda Winklaar, Girela Isabella i Carlientje Cleopa, tur a bai di 2-1. Natalie Lourens ku Emmely Jonis , ámbos di 2-2. Emmely Jonis a konektá 1 homerun. Rising Phoenix a dal 4 hit i hasi 1 eror. Janella Comenencia a karga ku e derota. Jacqueline Sophia ku Marie Windster, ámbos di 2-1.
Treasure New Era 6, The Fighters 4
Treasure New Era a bati 10 hit i nan a kometé 3 eror. Minerva Maduro tabata ganadó i Suyenne Otto-Apostel a bai di 1-1. Susmaline Rifaela, Idelmira Remilia, Minerva Maduro ku Sulene Lacruz, tur a bai di 2-1. Yurriene Gonzales a bai di 3-3. The Fighters tabatin 7 hit ku 3 eror. Sevilla Martina a resultá pèrdèdó. Juglin Winklaar, Lisette Hooi i Valerie Christina, tur a bai di 2-1. Jeandrelika Pablo a bai di 2-2.
Ekiponan Maskulino pa Boneiru i Punta Cana
Ekipo Jaws lo move pa Punta Cana djarason 17 di mei pa 10’or di mainta. Baranka tambe lo move ku mesun buelo. Pa djaweps mainta e delegashon di Jaws ta move pa Punta Cana, ke mèn nan ta pasa un anochi na
Capital esta, Santo Domingo. Jaws lo move ku Air Century. Ekipo di Baranka ta bèk ku nan spònser di hopi aña ku ta Baranka Napa Auto parts. Jaws ta hunga djaweps un wega i djabièrnè dos wega. Mester gana i si no gana pa sigi hunga ta move i basilá na Punta Cana un ratu òf basta ratu. Esei ta e intenshonan di Slowptich. Biaha, gosa i dibertí. Ta bai pa gana si, pero pèrdè ta keda gosa huntu manera nada no a pasa. Pitufos tambe a move djarason pa Punta Cana. Marlins i Ban Serio ya ta na Boneiru i nos tin portret di nan.
INFORMASHON DI SÒFTBÒL I BEISBÒL
Fanátikonan di Deporte , bon tardi. Nos ta den un siman ku hopi moveshon den Slowpitch. Na Kòrsou tin Kopa ABC&S di e hóbennan i na Boneiru tin mesun kopa na nivel di 50+. Ekiponan di Aruba, Boneiru i Sint Maarten ta yega djarason 17 di mei pa djoin esnan di Kòrsou. E torneo ta start djarason anochi kaminda ekiponan di Kòrsou lo topa ku otro. Den e promé wega pa 7’or ekipo Cicoza lo topa ku Terremoto i despues pa 9’or Swift lo topa ku DreamThrillers. Dos wega kandela pa start ku Kopa ABC i naturalmente ekiponan di Aruba, Boneiru i Sint Maarten lo tei for di djarason pa skout e ekiponan di Kòrsou
.
* * * * *
Delegashonnan di Ban Serio i Marlins a sali pa Boneiru djarason, miéntras delegashonnan di Pitufos, Jaws i Baranka a sali pa Punta Cana. Den nos edishon di djabièrnè nos lo tin un update di e dos ABCnan i di e Golden Athlete Caribbean Championship Series na Punta Cana. Great ku deportistanan veterano i esnan di deporte di dibertishon por keiru i sera konosí ku otro islanan den ambiente deportivo. Ta di dos aña ku ta organisá e Serie del Caribe òf mihó bisá Golden Athlete Caribbean Championship Series. Na 2022 e kompetensia tabata na Aruba. Baranka a hunga kontra Pitufos djadumingu 7 di mei den un wega bálido pa e torneo menshoná. E wega aki a tuma lugá na Sam Bunting Ballpark. Baranka a gana ku skor di 5 pa 4. Hopi refuerso den e ekiponan menshoná a hunga den e wega aki. Kenny Hellement i Jonis a kombiná pa gana e wega aki. Den e Pul di Baranka ei lo tin Bambinos di Aruba, Banco Central di República Dominicana i Pitufos.
* * * * *
Pa loke ta trata Liga 50 na Kòrsou, Baranka a laga Ban Serio den tereno i Baranka ta úniko ekipo invikto den 50+ Sòftbòl. Riba hit di Edmar Cornelia, Myron Wijman a nota e kareda pa laga Ban Serio den tereno. E wega a terminá ku skor di 12-11, ku Kenny ‘Refuse to Lose’ Hellement e picher ganadó. Ela risibí relevo di Curtly ‘Gino’ Valeriaan ku a saka e último out, pa despues Baranka bin laga Ban Serio den tereno. Myron Wijman a bati di 3-3 i ta di 3 wega sigí ku Myron ‘Joonchi’ Wijman ta batiendo di 3-3. Tantu Myron Wijman ku Edmar Cornelia ta èks Ban Serio. Despues di e weganan di djasabra último Baranka ta úniko ekipo invikto den kampionato 50+.
* * * * *
Liga 50 ta break un djasabra pa despues sigi djasabra 27 di mei na Van Egnelen Ballpark. E wega di djasabra ei tabata último wega ku a tuma lugá den Stadion Post 6. E liga tabatin un bon eksperensia ku Stadion Post 6 pa na momentu di pèrtá por bolbe bèk den e Stadion menshoná. Standing despues ku tur ekipo a hunga 4 pa 5 wega ta lo sigiente. Baranka 4-0, Ban Serio 3-1, Marlins 3-1, Sluggers 3-1, Jaws 3-2, Pitufos 3-2, Lions 2-3, Flamboyan 1-3, Catpower 0-5, Artemisa 0-5. Dia 27 di mei pa 2’or ta Baranka kontra Marlins, wega kandela na Van Engelen Ballpark.
* * * * *
Play-off di the Diamond Stars League a start kayente. Tur dos seri ta empatá. Number 1 ku ta ekipo Rising Phoenix a gana di Nos Goso djabièrnè ku skor di 5-4 i djasabra Nos Goso a bini bèk pa gana Rising Phoenix ku skor di 4-3. Ta trata di e seri entre number 1 i 2. Den e otro seri ekipo number 3 ku ta Treasure a pèrdè djabièrnè ku skor di 4-3 kontra di The Fighters i bini bèk djasabra pa gana ku skor di 6-4. Play-off ta sigi kayente djabièrnè awor na Sam Bunting Ballpark. E pèrdèdó di e seri Treasure i The Fighters lo keda eliminá. Ganadó di e seri Rising Phoenix vs Nos Goso lo pasa pa final, miéntras e pèrdèdó lo topa ku ganadó di The Fighters vs Treasure. Ta trata di un seri sistema page i mihó di 3. Nos ta keda te aki pa awe.
