Djaweps 30 di aprel lat atardi
Shon Pe Hooi un dje gran lidernan di deporte di tur tempu a bai sosegá
WILLEMSTAD – Djaweps 23 di aprel 2020 Deporte Kòrsou a tene un entrevista largu ku Shon Pe Hooi, konosido entrenadó di tur deporte den area di Banda Bou i na Kòrsou. Shon Pe a pidi nos pa tene e entrevista kun’é debí ku e ta bai fayesé, e no tin hopi siman mas di bida i e ke pa tur hende konosé mas djaserka. Deporte Kòrsou no a duda i dentro di un ora ku ela yama nos, a start un entrevista profundo via telefòn ku sosten di su yu stima, otro lider di deporte, Aishel Hooi. Dia, 30 di aprel 2020 den oranan tempran di anochi nos a tende e tristu notisia Ku Pedro Hooi mihó konosi komo Shon Pe a bai sosega. Aishel Hooi a konfirm e notisia pa Deporte Kòrsou.
ENTREVISTA
Den salida di e entrevista mesora Shon Pe a bisa nos, no den area di Banda Bou so ela traha komo lider den deporte, pero rònt Kòrsou di Banda Ariba te Banda Abou. Shon Pe Hooi dor di su trabou komo lider den di deporte (sportleider) na Fundashon Sedreko a siña hóbennan hasi di deporte, tur tipo di deporte den tur bario na Kòrsou. Na final di e entrevista Shon Pe ta hasi un apelashon na Gobièrnu (FDDK) pa bini bèk ku e deporte den bario manera e tabata ántes. Shon Pe a risibí Krus di Merito i Ridder in de Orde van Oranje Nassau durante añanan ku a pasa pa su trabounan na bienestar di komunidat di Korsou.
SHON PE HOOI
Pedro Celestino Hooi a nase na Kòrsou 19 di mei 1941 i ta biba na Phlip. Pedro Hooi a nase na Lelienberg i a biba na Otrabanda un tempu i traha e trabou entre otro di sneiru (kosedó). Shon Pe Hooi tin 7 yu (3 di kriansa). Esun mas grandi ta e konosido entrenadó di Sòftbòl Little League i Sòftbòl Femeneino Dòbel A, Aishel Hooi. Timnan Soto i Lelienberg ta ekiponan dirigí pa Aishel den Sòftbòl Dòbel A i Little League. Shon Pe na palabra: “Kòrda no ta Banda Bou so mi a siña mucha hasi deporte i traha komo sportleider, pero rònt Kòrsou di Banda Ariba te Banda Abou. Ma train selekshon grandi ku hungadónan manera Darryl Dorthaal i Yuyu Brunkaard nan aki den selekshon i nos a hunga komo selekshon number 2. Den un torneo internashonal na Kòrsou na momentu ku selekshon Colombia a kai afo nos a hunga i gana tur selekshon. Etienne Sillé tabata na kabes di selekshon 1 i tabata guiami den selekshon 2 tambe. Semper di mi bida mi a lesa hopi, bai buki. Lesa hopi mes i teoria ta hopi importante anke hopi no ta kere. Den bokseo ami tabata trainer di Fitchting Mack ku ta mi subrinu. E tabata kampion di Europa i di 5 riba rankin Mundial di Bokseo. M’a bai Spaña pa kurso di entrenado di bokseo i top’e despues einan. No tabata manera mi a spera di sr. Mack si, pero e traningnan ku mi a haña komo entrenadó di bokseo si a bai bon. Mi a topa ku Jose Legrand eks kampion Mundial di bokseo e tempu ei, einan. “
ENTRENADO/HUNGADO
Shon Pe: “E tempu nan aya nan tabata manda hopi entrenadó den tur ramo di deporte den eksterior pa siña e kos i hisa nan nivel. E tempu di defuntu Nelson Monte komo hòmber di gobièrnu di deporte mi a bai Mexico pa kurso di entrenadó di futbòl ku entre otro defuntu Wilhelm Camword. For di kategorianan, Wimpiri, Blenchi ets mi tabata train e muchanan futbòl. Mi tim di Banda Bou tabata gana tur tim. E hendenan di Boka Sami tabata bisa ta Shon Pe ta train selekshon i nunka Shon Pe no a hunga bala, nunka di su bida. Mi mes komo hungadó tabatin tur dominio di bala. Ku mi 37 aña ma hunga mi promé wega na Suffisant kontra un tim di Buena Vista ku tabata gana tur hende. Un dje bolantenan un hungadó di, gai ta kontra Shon Pe nan aki bo ta kere kiko e hendenan aki por hasi. Nan tabata invikto, ami tabatin hopi muchu yòn huntu ku mi den tim, Raichel Hooi nan aki. Shon Pe su tim a kibra nan invikto. Mi ta traha ku e bala sin fin, no pidimi kòp e bala si. Mi topa bo den e 2 meter ei, saka mi ta saka bo. Nos a hunga kontra Rooi Santoe na Barber. Mi tabata mas grandi ku tur e otro hungadonan. Tabatin un gai ku fam Apostel un gai di Rooi Santoe. Ora wega a kaba ela bisa ta bo mes tabata den e wega awoi, nan a keda sorprendé di mi habildiatnan ku e bala di futbòl i nos a dal un serbes huntu.”
“Na 1994/1995 mi a bai lès di fitnes na Weert na Hulanda, na Thiel tambe. Mi a haña diploma di ‘personal training internashonal’. Hende di tur parti di mundu a bai lès na Thiel. Tur parti di Mundu tabata bini ei. Ei bo ta konosé tur e muskulonan den e hende, e deportista su kurpa pa bo no hasi daño na nan. Ma bai te aya na Hulanda, mi mester yama danki na Ibi Petronella i Lipo Elhage di Fundashon Sedreko. E deporte mes ku mi ta gusta mes mes ta futbòl. Ma hunga den tim ku Aishel. Mi tabata na kabes di varios selekshon di mucha. “
Aishel yu di Shon Pe ta splika ku na grandi su tata a kuminsa hunga bala i su tata tabata grandi den bolante. Aishel: “Ta via dje e bala mester pasa pa e yega su destino. Papai aparte di futbòl i bokseo, papai tabata multi funshonal i tabata sneiru tambe i tabata kose flus pa tur hende na Seroe Otrabanda na Charlottestraat (e hanchi di Sint Thomas College MAVO bin abou, bo mester sigi stret bini abou). Eibanda nos tabata biba un tempu. Ei nos a lanta na yòn.”
Shone Pe: “Mi tabata coach di selekshon di futbòl huntu ku Rob Groener na Meksiko i nos a bai selekshon ku 9 mucha di Banda Bou di e 18 nan. 7 di nan tabata den tim básiko, tabata un tim U-17 segun mi. Gana Guatemala tambe. Hungadónan manera Terry Rosina, Raishel Hooi, Ludson Susanna, Frankel Vicario, Virgil Francisca, Junny Toreman, Aldrin Troeman, Wensley Martina i Eugene Constancia di Boca, Curley Poppen, Eric Fecunda. Ku mi 37 aña mi a kuminsá traha na Sedreko. Tur kos mi di mi ta siña einan. Mi mes por traha tambe riba mi mes, ke men mi mes a kaba di rakel mi dak na grandi aki na mi kas. Aishel por saka potrèt pa manda pa boso, semper a kos tabata den mi pa siña hende hasi deporte i mas kos. Na grandi mi tabata kore bai laga Aishelnan aki tur riba 100 meter. Riba 40 aña riba 50 aña ainda kore bai laga tur hende. Ku mi 53 aña mi a bai train ku mi yu muhe su amigu na Hulanda e gai tabata 35 aña i tabata un tim di mucha hoben Hulanda (Makamba). Mucha yòn, awel leu tur hende tabata keda. E coach a bisa mi ku e tin 35 aña anto ami ku 53 aña, kon mi por ta mas fit kune. Mi ta kue e bala ei bai laga tur hende. Mi tabatin hopi techniek i hopi teorie debí ku mi ta lesa hopi buki. Mi ta lesa e kosnan den buki ei bai treinnan i trein hende nan. By the way ma kuminsa trein hende ku 21 aña. Ma kuminsa train bòksdó Fighting Mack nan aki tempu mi tabata tin 21 aña. Mi tabata un talento skondí den futbòl pero ma preferá di train hende. Durante training mi mes ta fluit anto mi mes ta hunga e bala i e muchanan no por kita e bala for di mi.”
Di dos parti entrevista ku
Shon Pe Hooi dirigente grandi di deporte di Kòrsou
Nos a pone e entrevista largu aki den dos dos parti e promé parti, nos ta sigi ku ‘part II’. Algun logro grandi di Shon Pe Hooi tabata entre otro ‘match maker’ di programa bòksistiko kaminda Muhamad Ali (Cassius Clay) a partisipá den un pelea di eksibishon aki na Kòrsou kontra di Bob Foster. E tempu ei Cassius Clay tabata kampion Mundial den bokseo den aña 70. Shon Pe tabata promotor i ‘match maker’ di bokseo. Shon Pe Hooi a hasi hopi den Sòftbòl tambe e tabata coach na dos okashon di selekshon di Sòftbòl Little League.
SOFTBOL
Shon Pe a kuminsá ku sòftbòl hopi tempu pasa ku deporte den bario i einan Aishel a djòin Shon Pe. Tur deporte Shon Pe tabata hasi riba vèlt, slagbal, sòftbòl, vòli, basket, tempu den deporte den bario. E sòftbòl tabata un tiki mas organisá i einan e sòftbòl a bira e kos mas prinsipal. Shon Pe tabata train e muchanan beisbòl tambe na Banda Bou entre otro Ludwin Obispo ku a bira kampion di Mundu komo mucha di Banda Bou den selekshon Senior League na 2002. Shon Pe: “E no a hunga den Marchena den Santa Maria niun die otro timnan ei. Tin algun polis tambe ku a hunga huntu ku nos pero nan a kuminsa mas grandi hungadonan manera Jurnic Floranus i Van Der Gen ets.
PAISNAN
“Ma bishita masha hopi pais. Hulanda, ma bai Trinidad 2 biaha, Venezuela masha hopi biaha mes ku Ibi Schoopnan aki, Puerto Rico ku Sòftbòl, Aruba tambe ku Sòftbòl, Meksiko ku futbol. Spaña komo entrenado di bokseo. Varios pais mas di mes.”
MENSAHE
“Trata pa tur mucha ku bo ta bezig kune, zorg pa bo ta bon bon ku nan. No laga e mucha hasi loke e kier ku bo. Ami a yega di kita unifòrm for di hunga estelar Bronco ‘Broertje’ Rosina nan aki foi riba velt i gana tòg tambe. Loke mi tabatin hopi bon ta e parti mental, keda trankil, e parti mental ta gana hopi wega. “ Shon Pe a bisa Deporte Kòrsou den un entrevista telefoniko djaweps 23 diaprel.
Aishel Hooi: “Algu pa agregá aki, dor ku nos tabata biba den e barionan marginá, nos ta sali tempran den e barionan bai Punda i Papai ta kumpra kipashi beleg i kos di kome pa nos. E tabatin un outo Volkswagen i ta hinka tur hende den e Volkswagen chikinan ei, i bai Pariba. Polisnan ta bisa mi tata bai poko. Mi tata nunka tabata papia palabra malu. Shon Pe Hooi: Muchanan sinta riba kushinchi di e outo, stul patras i e stul a kuminsá saka huma debí ku e bateria di e Volkswagen ta bou di e stul.” Aishel: “Papai tabata un ehèmpel pa otronan, e no tabata papia palabra malu. Nunka Papai no ta yama niun hende, bo. “ Shon Pe: “Mi no n sa dikon nunka mi tabata yama e hende, bo.”
ORGUYOSO
Shon Pe ta masha orguyoso mes di su yunan espeshalmente e yu di kriansa Nihaila Obispo ku a kaba VWO pa despues drenta polis pa Nihaila su disiplina. Nihaila sòftbòlista di kasi tur selekshon di su edat den Sòftbòl Little League a drenta skol di polis i slag mihó. “ Mi ta hopi orguyoso ku ela drenta polis i ta kanando hopi bon. Mi no por laga esei afo debí ku deporte tambe ta yuda forma Nihaila i deporte ta yuda forma e hende”, Shon Pe Hooi ta terminá e entrevista.
Deseo kumpi di Shon Pe, pa e papia di su karera hopi ekstenso.
Shon Pe un dje grandinan, SOSEGA NA PAS
