Shuruendy Valeriano a firma ku Santa Maria Pirates
WILLEMSTAD- Siman pasá Shuruendy Valeriano ku a hunga den 2020 i 2021 ku Royal Scorpions a pasa pa Santa Maria Pirates. Den pasado Valeriano a hunga den Santa Maria kaba i tabata miembro di selekshon Curacao Stars ku a hunga den Klásiko di Hubenil na Kòrsou na 2017. Den e klásiko Hubenil Shuruendy tabata picher den relevo i su ERA tabata 0.00.
Santa Maria ta serando nan kurá poko poko, pero sigur sin muchu propaganda. Santa Maria Pirates a firma Rigene Martina, un dje pichernan prinsipal di e ekipo. Nan a logra haña e coach di disiplina, Richard ‘Chado’ Obispo ku tabatin masha hopi aña ku e organisashon Santa Maria promé ku ela bai Royal Scorpions. Shuruendy Valeriano a nase 26 di febrüari 1998 i ta bai hasi 24 aña. Ela firma profeshonal Ku Tampa Bay Rays i hunga dos aña na República Dominicana.
Su promé aña 6 ganá i 3 pèrdí ku ERA di 2.38. Di dos aña 4-2 ku ERA di 3.27. Bon sifra pero tòg a keda release pa organisashon di Tampa Bay Rays. Dia 23 di ougùstùs 2019 ela keda lagá den libertat pa Tampa Bay Rays. Ela firma dia 1 di sèptèmber 2017. Na 2020 Shuruendy a tira 29.2 inning den Royal Scorpions gana 3 wega i pèrdè 1, ku un ERA di 4.55. Su ERA tabata bon den 2020 te promé ku wega number 5 di play-off final kontra ekipo Santa Rosa kaminda no a bai bon. Aña pasá Shuruendy Valeriano tabatin 7 inning tirá ku ERA di 3.85 ku Royal Scorpions. Un estrea hopi apart tantu den Beisbòl komo picher ku den Vòlibòl. Shuruendy a bira MVP di e play-off final pa Watakeli kontra di Stakamahachi na 2020.
Royal Scorpions kasi klá ku Claycandy Hariquez
WILLEMSTAD- Royal Scorpions ta duru tras di Claycandy Hariquez di Santa Maria Pirates. Tin mas ekipo tras di e picher derecho aki, ku un tempu tabata prospekto number 1 di Kòrsou. Claycandy no a logra firma profeshonal i a subi despues komo prospekto grandi di Santa Maria 8 aña pasá i bira kampion ku e ekipo Pirata na algún okashon. E tabata subi montíkulo i hasi e trabou. A 2018 Clacandy a tira 36 inning, pero despues no tabata tira hopi inning mas den Beisbòl Dòbel A. 2020 Clacandy a tira 7.1 inning i 2021 8.2 inning. Apesar di no ta muchu aktivo e dos último añanan, tòg ekiponan grandi tin hopi interes den Claycandy Hariquez. Deporte KòrsouInning a risibí un pòtrèt kaminda un dje grandinan di Royal Scorpions, Gai Lihe, ta den negosashon fuerte ku Claycandy, pa e siman aki Mompy ‘Pai’ van Gurp mes presentá pa firma e picher Claycandy Hariquez, ku un tempu tabata prospekto number 1 pa firma ku organisashonnan di MLB. Resientemente Roxienne ‘Gai Lihe’ Barbolina a bisa: “Si hendenan sigi bula den mi kurá, nan lo topa mi den nan kurá.”
Fanátikonan di Deporte Kòrsou, bondia i felis wikènt. Nos tei atrobe ku hopi informashon di Beisbòl i Sòftbòl. Direktiva di Diamond Star League a informá nos ku nan ta duna e 8 ekiponan dos siman mas pa train i hinka nan kurpa den kondishon. Kampionato lo start dia 18 di febrüari den Sam Bunting Ballpark. Hopi espektativa pa e liga ku lo start mas tempran ku e otro liganan di Sòftbòl Femenino Veterano.
* * * * *
Santa Maria Pirates a firma e picher Shuruendy Valeriano, un tremendo picher di Beisbòl i un super estrea den Vòlibòl ku a sali MVP di final di kampionato di Vòlibòl di 2020 ku ekipo Watakeli. Te asina leu ku nos ta kòrda no tabatin un picher estrea den Beisbòl ku tabata strea den Vòli tambe. Espeshalmente e kombinashon di picher i hunga Vòli riba nivel haltu. Valeriano tabata picher estelar di e selekshon Hubenil ku a bira sup kampion na Kòrsou den e kampionato Big League Hubenil (Klásiko di Beisbòl Hubenil Latino Americano na 2018). Shuruendy Valeriano un tempu tabata ku Santa Maria i awor a bai bèk serka Kenneth Gijsbertha.
* * * * *
Un ratu bèk pa e Klásiko Hubenil ku e aña aki lo kumpli 5 aña. 7 pais a partisipá e tempu ei (2017). Santo Domingo, Puerto Rico, Mexico, Colombia, Aruba, Boneiru i Kòrsou (ku 2 tim: Curacao Warriors i Curacao Stars). Curacao Warriors a bira kampion ganando di Curacao Stars ku skor di 7 pa 2. Un públiko grandísimo (pa hopi hende rekòrt) a akudí na Tio Daou Ballpark pa mira e gran final ku tabata un djasabra anochi entre dos selekshon di Kòrsou. Puerto Rico ku tabata gran faborito a pèrdè kontra Curacao Warriors e djabièrnè promé ku e final. Hungadónan di Puerto Rico a hasi algún kos di anti deportivo i ta polis mester a yama pa sakanan ku bus for di stadion i hiba nan Mancamp. Curacao Warriors a gana meresídamente e djabièrnè promé.
* * * * *
E torneo ei tabata dediká na 4 baluarte. Gonzalo Cuales, Osvaldo Dulzaides, Eithel Isebia i Carolus Antersijn i sra Helen Ferdinandus. Saludo pa nos amigu Eithel Isebia, doño di ekipo Cicoza ku a hasi aña djasabra. Eithel, un dje grandinan den transmishon di Beisbòl na radio, espeshalmente Little League. Eithel un baluarte di Slowpitch a kumpli un edat rondo djasabra último. Cicoza ta un dje gran ekiponan (organisashonnan) di Sòftbòl Slowpitch ku ta leu riba 40 aña. Hopi biaha durante e homenahe, e CV di e deportista/dirigentenan di keda te einan i ratu ratu nos si ta bini bèk riba e baluarte, pero hopi kòrtiku naturalmente.
* * * * *
Eithel a traha na Dienst voor Arbeidszorg pa hopi tempu, ku aspirashon polítiko. Eithel primeramente a bai traha komo Fractie Medewerker na Konseho Insular di Kòrsou. Despues Eithel a sirbi nos komunidat pa kasi 4 aña den Parlamento di Kòrsou. Eithel a stòp ku politika pa despues sigi na DOW i baha ku penshon despues di 35 aña den Gobièrnu.
* * * * *
Eithel semper tabata mashá metí i dediká na deporte. Prinsipalmente e deporte Hubenil tabata Eithel su kos. Na aña 1992 Eithel a funda e fundashon PRESDA ku ta para pa Fundashon Pro Rekonosementu i Sosten di Deportista Antiyano. PRESDA pa hopi aña konsekutivo tabata organisá i otorgá e ‘Laurel di Oro’ pa deportistanan lokal ku a destaká. E evento aki tabata tin atenshon nashonal i internashonal, mirando ku ta e úniko evento di e tempu ei kaminda deportistanan (prinsipalmente Hubenil) tabata keda premiá i motivá pa sigui hasi deporte i desaroyá positivamente. Den gran forma Eithel. Pa nos un plaser di pone algu kòrtiku di e karera di Eithel Isebia, un dje grandinan di Slowpitch, tata di Ryan Isebia di SBAB i Cicoza.
* * * * *
Un ratu den Slowpitch. Basta interes den Liga 50 di Sòftbòl pa e batidó di poder Sigbert Juliana. Sigur 4 ekipo tin interes den e hungadó aki ku ta den Vosama 40 i 50+ di Beisbòl Veterano. Nos a drenta den kontakto ku Sigbert ku ta un fiel lesadó di nos kolumna. Sigbert ta preferá di keda hunga Beisbòl den ekipo Vosama 40 i 50. Ekipo Vosama tin skarsedat di hungadó den 40+ i ta bira poko pisá pa Sigbert hunga Beisbòl i Sòftbòl Liga 50 pareu. Si ekipo Vosama logra haña e kantidat di hungadónan den 40+, Sigbert lo pensa kiko e ta bai hasi. Ekipo Otrabanda 40+ tin varios hungadó ku a bini kas bèk. Marchena Braves i mas ekipo di Beisbòl Dòbel A ta por la goma. Keda pendiente pa mas e dianan benidero.
