Swift kampion Torneo Kopa ABC&S Jaws kampion di Torneo di Karibe na Punta Cana i Ban Serio kampion Torneo Kopa ABC&S 50+
WILLEMSTAD – Swift ku viktoria di 17 pa 7 riba Cicoza a bira kampion Torneo Kopa ABC&S djadumingu 21 di mei na Van Engelen Ballpark. Un públiko grandísimo tabata presente pa mira e weganan di play-off semi-final i final djadumingu. Richene Martina tabata tremendo den relevo pa Swift pa bai ku e viktoria. E picher Venesolano Emilio Velarde a habri pa Swift. Juremi Fornerino ku tabata tremendo pa Swift a konektá dos homerun. E no a habri e wega, pero a drenta despues komo pinch hitter batiendo homerun i den su sigiente turno tambe ela bati homerun. Cicoza a usa kuater picher ku no por a bini kla ku e ofensiva di Swift. Swift su defensa tabata tremendo ku varios double play na momentu ku Cicoza tabata bira peligroso. Despues di wega tabatin entrega di premio ku animashon di Dolce.
.
Jaws kampion di Torneo di Karibe na Punta Cana
PUNTA CANA - Jaws 50+ a bira kampion di e Golden Athlete Caribbean Championship Series ku a tuma lugá na Punta Cana (República Dominicana). Djadumingu 21 di mei, Jaws a gana e ekipo Bario Obrero di Puerto Rico ku skor di 10-9 pa bira kampion di e torneo den kategoría 50+. Despues ku e wega a terminá, tabatin selebrashon total riba tereno, kaminda ekiponan di Kòrsou ku a partisipá na e torneo a subi tereno pa felisitá ekipo Jaws. Ekiponan di Kòrsou Pitufos i Baranka tambe a partisipá na e torneo huntu ku algun ekipo di Aruba.
Ban Serio kampion Torneo Kopa ABC&S 50+
KRALENDIJK - Ban Serio a gana Marlins den final ku skor di 9 pa 5 i bira kampion Kopa ABC&S 50+ na Boneiru. E final a tuma lugá djadumingu 21 di mei den Julio Angela Ballpark. Den semi-final ekipo Ban Serio a gana di Sint Maarten Vets ku skor di 19 pa 1 i Marlins a gana Aruba 15-5. E wega final a bai solamente 5 inning debí na skuridat.
MAS INFORMASHON DI SÒFTBÒL
Fanátikonan di Deporte Kòrsou, bonochi. Despues di torneonan ABC&S na Kòrsou/Boneiru i Torneo di Karibe na Punta Cana, djadumingu, 21 di mei den oranan di mainta tabatin e partidonan di semi-final i final di Kopa ABC&S na Van Engelen Ballpark. Den e promé semi-final pa 12’or Swift a topa ku Redskins (Aruba) i pa 2’or Cicoza a enfrentá Dream/Thrillers. 4’or tabatin e gran final entre e ganadónan di mainta. Esaki pa loke ta trata e ABC&S di e hóbennan na Kòrsou. Bon públiko tur dia for di djarason te ku djadumingu. E weganan tabata kompetensia fuerte kaminda ta modified Slowpitch stail di slingshot tabatin ku e mihó hungadónan di Beisbòl i Sòftbòl di Aruba, Boneiru, Kòrsou i Sint Maarten.
* * * * *
Promé ku e wega final 3 veteranisimo di ABC&S a kompetí den Homerun Derby. Ta trata aki di Tico Ramazan di Kòrsou, Pooy Flanegin di Aruba i Edichi Agostien di Boneiru. Yu di e 3 veteranonan aki ku ta aktivo komo hungadó den e ABC&S aktual a picha pa e veteranonan aki bati. Na Boneiru tabata Ban Serio kontra Tigers i Marlins kontra Astros den 50+ ABC&S. Ban Serio a yega final ku rekòrt di 2-0 i lo topa ku Tigers di Sint Maarten den semi-final pa 11’or am den Stadion na Boneiru. Pa 1’or ekipo Marlins (2-0) lo topa Astros di Aruba. E gran final di 50+ tabata 4’or di atardi i despues pa 6’or mester tin final den e kategoría femenino. Den oranan di atardi tabatin final di 60+ entre Sint Maarten Vets i Bonaire Stars.
* * * * *
Den wikènt nos a risibí informashon di weganan na Punta Cana tambe. Jaws a topa Puerto Rico den final na Punta Cana pa loke ta trata e kategoría 50+ . Jaws a gana Pitufos 12 pa 3 den semi-final. Ekipo Bario Obrero di Puerto Rico a gana Banbinos den Aruba 8 pa 3 den e semi-final. Na Punta Cana den e Golden Athlete Caribbean Championship Series tabatin kategoría 60 tambe. Den 60+ e ekipo Pitufos a partisipá i no a logra klasifiká pa final.
* * * * *
Djasabra tabatin apertura di kampionato di Beisbòl Dòbel A ku ta dediká na Philip ‘Lipo’ Elhage. Den e promé wega di e kampionato Santa Maria a gana Wild Cats ku skor di 12 pa 9. E hóben Rodston Inecia a dal un homerun pa Wild Cats den kousa pèrdí. Sherwenne Antersijn a bati di 6-3 ku 2 RBI pa Santa Maria. Risandro Pastor di 4-3 pa Wild Cats ku 2 RBI i Shurendell Mujica di 5-3 ku 3 RBI. Wild Cats tabata ganá 7-0 despues di dos inning, pero den di 4 i 5 inning, Santa Maria a nota 3 i 6 kareda pa bòltu e skor. Beisbòl mester a sigi djadumingu. Masha hopi hungadónan mes di Dòbel A den Torneo Kopa ABC&S na Van Engelen Ballpark.
* * * * *
Kampionato di Beisbòl Veterano ta start djasabra awor na Vi Jansen Ballpark. Promé ku e wega di 3’or lo tin un apertura ofishal kaminda Minister di Enseñansa, Siensia, Kultura i Deporte lo hiba palabra i lansa e promé bala pa ofishalmente start e kampionato. Presidente nobo di BEVEKO ku ta Gilbert Denisia tambe lo hiba palabra. Wega di 3.30 lo ta entre Jandoret Raiders i Isla Crackers. Den kurso di siman nos lo tin mas detaye di e kampionato di Beisbòl Veterano i varios kambio ku a tuma lugá. Entre otro Raymond Soerka i Suri Mathilda ku a sali di Azucar i bai Otrabanda Veterano.
Pa loke ta trata resultadonan final di Kopanan ABC&S i torneo di Karibe na Punta Cana, na Kòrsou Swift a bira kampion ganando di Cicoza 17 pa 7 den Van Engelen Ballpark. Na Boneiru Ban Serio a gana Marlins 9 pa 5 i titulá kampion di Kopa ABC&S 50+. Jaws a gana Puerto Rico 10 pa 9 i bira kampion di e torneo di Karibe. Nos ta keda te aki pa awe.
