The Fighters kampion Torneo internashonal di Rising Phoenix i Baranka ta pasa pa final 40+
WILLEMSTAD - The Fighters a gana ekipo organisadó Rising Phoenix den final i bira kampion di e torneo internashonal di Sòftbòl Femenino 35+ ku a konta ku partisipashon di ekiponan di Kòrsou, Boneiru i Hulanda. Ekiponan ku a partisipá ta Rising Phoenix, Bonaire Angels, The Fighters, Nos Goso, Dream Team (Hulanda) i Treasure. E final a tuma lugá djadumingu 3 di novèmber 2024 na Sam Bunting Ballpark.
Organisadónan ta yama un danki grandi na tur e 6 ekiponan ku a hasi e torneo aki un éksito, apesar di orarionan ku no tabata den nan man. Danki na e invitado special direktamente for di hermana Isla Aruba ku ta Milburga Martinus.
PREMIONAN
The Fighters Kampion.
Rising Phoenix Supkampion.
MVP Mairis Obispo.
Kampion Honronero Anushka Delando.
Kampion Pitcher Marien Windster.
Baranka ta pasa pa final i Swift ta empatá seri
WILLEMSTAD- Djaweps, 7 di novèmber tabata fecha number 2 di e play-off page system di Liga 40. E weganan a tuma lugá na Van Engelen Ballpark. Den e wega bálido pa number 1 i 2 di play-off ekipo Baranka a gana Gamers 11-10 i klasifiká pa final. Gamers a menasá fuerte den nan último chèns notando 2 kareda, pero keda kòrtiku. Djamars awor tin wega number 3 entre Swift i Cicoza.
Baranka 11, Gamers 10
Baranka a bati 10 hit i kometé 6 eror. Raylison Gijsbertha a gana. Raymond Leonora di 3-2, Charles Merite i Luigi Alvarez di 4-2. Gamers a bati 11 hit i kometé 1 eror. Fernando Rosario a resultá e picher pèrdèdó. Ryan Imperator a bati di 4-3. Ryan Samuel a bati di 4-2 i Elys Gonzalez di 2-1.
Swift 13, Cicoza 2 Swift a bati 12 hit i hunga sin kometé eror. Enrique Madera tabata e picher ganadó. Leroy Antonia, Carlos Gil, Emilio Velarde i Minald Seferina a bati di 3-2. Cicoza no a konektá hit i nan a hasi 3 eror. Jeremy Obispa tabata e picher pèrdèdó.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt. Djasabra 16 di novèmber ta start ku play-off final di Liga 50 entre Ban Serio i Baranka na Van Engelen Ballpark. E seri aki ta primintí di bira un seri final kandela. Na 2023 Ban Serio a swip Baranka den play-off. Na 2022 Baranka a gana di Jaws i na 2021 Baranka a gana di Pitufos. 2017, 2018 i 2019 Ban Serio tabata kampion i na 2020 no tabatin final di Liga debí na Covid-19. E weganan di Liga 50 di djasabra 9 di novèmber entre Ban Serio i Baranka a keda kanselá en konekshon ku entiero di miembro di Pitufos i di Liga 50 di Sòftbòl Raymond ‘Boy’ Constancia. Weganan di Beisbòl Veterano lo sigi normal djasabra i djadumingu.
* * * * *
Awe, djasabra 9 di novèmber 2024 lo hiba èks hungadó di Sòftbòl i Beisbòl i èks deportista, Raymond ‘Boy’ Constancia na su último lugá di sosiegu. Entiero ta tuma lugá na Jandoret. Lo risibí bishita di kondolensia di 12’or pm pa 3’or pm na Misa di Jandoret. Lo tin un Santo Sakrifisio di Misa pa 3.30, pa despues sigi pa Santana di Jandoret. Boy Constancia tabata aktivo den ekiponan di Sòftbòl, Beisbòl, Futbòl i Vòlibòl. Un personahe hopi keri i hopi popular den Sòftbòl Slowpitch i Beisbòl Veterano. Nos tin masha hopi pòtrèt di Boy Constancia den akshon ku su ekiponan Pitufos, Isla Crackers i Jandoret Raiders.
* * * * *
Den edishon di djaweps nos tabatin resultado di weganan di Liga 40, kaminda ekipo Baranka a pasa fásil riba Gamers i Cicoza mester a lucha pa gana Swift. E weganan a terminá ku skor di 14-3 pa Baranka riba Gamers i Cicoza a derotá Swift 16-14. Nos ta pendiente pa weganan ku a tuma lugá djaweps 7 di novèmber na Van Engelen Ballpark. Gamers a terminá number 1, Baranka number 2, Cicoza number 3 i Swift number 4. Ta hunga sistema page, ke mèn e ganadó di e seri di Baranka/Gamers lo pasa dirèkt pa final. Gamers tabata hopi sigur di su mes durante e kampionato regular, pero a sali i pèrdè ku skor grandi kontra di Baranka ku a buska tur su soldatnan pa e play-off manera ta e kaso den Liga 50.
* * * * *
Den Liga 60 ta kandela tin djadumingu awor na momentu ku Jaws topa ku Nos Tambe Por den e gran final di 60+ na Frank Curiel Ballpark. Ta spera un públiko mas grandi ku djadumingu último den semi- final, debí ku ta final i no tin wega riba otro parkenan na Kòrsou. Manera nos a skibi na varios okashon Jaws ta kampion di 2022 i 2023 i Nos tambe Por ta kampion e 3 añanan promé, esta 2019, 2020 i 2021. Jaws tabata kampion na 2018. Promé ku esei tabata Los Amigos ku tabata kampion na 2016 i 2017 ku pichernan manera Wim Felicia i Siegfried Lopez. E dos pichernan menshoná, aworaki ta den ekipo Nos Tambe Por.
* * * * *
Nos a risibí algun estadístika di Liga Amstel ku ta start ku play-off awe na Van Engelen Ballpark. Promé wega lo ta entre Cicoza i Gamers pa 7.30’or sigí pa Terremoto vs Thrillers. Djasabra tin 4 wega programá i Liga Amstel tambe ta hunga sistema page. Ban spera ku promé ku desèmber tantu Liga Amstel, Liga 40, i Liga 50 a terminá na Van Engelen Ballpark. Manera kos ta bai den Beisbòl Veterano tin indikashon ku den desèmber ainda tin Beisbòl Veterano na Vi Jansen Ballpark.
* * * * *
Nos ta bai bèk den tempu un ratu. Jandoret a bira kampion ku Boy Constansia komo un di grandinan den tim. Raiders ku bon picheo di Renato Anasagasti djasabra i di Randolph ‘Johnny’ Balentina djadumingu a bira kampion temporada Beisbòl Veterano 2014. E wega number 2 a tuma lugá djadumingu 2 di novèmber 2014 Jandoret Raiders a gana Vosama tantu djasabra komo djadumingu i tur e dos weganan a terminá ku skor di 3 pa 1. Despues di wega tabatin entrega di premio na e kampion Jandoret Raiders i supkampion Vosama. Johnny Balentina ku a tira wega kompletu djadumingu a bira MVP di e seri final. Renato Anasagasti di Jandoret Raiders a bira kampion picher di temporada regular. Kampion bate tabata Egbert Polonius di Bulldogs. Mayron Wijman a terminá komo lider di homerun. Jandoret Raiders a selebrá te den oranan lat di anochi na nan sede na Jandoret. Tabata e promé di e 5 titulonan sigí ku Jandoret a gana den Beisbòl Veterano 40+. Nos ta keda te aki pa awe i te djaluna ku Poder di Dios.
