Konferensia di Prensa Torneo Creme de la Creme
WILLEMSTAD –Durante di un konferensia di prensa organisá dor di Fundashon Baseball Team Tra’i Seru djaluna dia 7 di sèptèmber, a partisipá ku nan ta organisá dia 12 di sèptèmber te ku 4 di òktober benidero e di diesnuebe torneo di baseball Creme de la Creme.
E torneo ta konta ku apoyo di APC, RBC Royal Bank, Kenley Jansen 74 Foundation, Fundashon Desaroyo Deportivo Kòrsou (FDDK), komo e patrosinadornan prinsipal i ko-patrosinador Coca-Cola i Lovers.
E aña aki ta dediká e torneo na Stanley "Hino" Simmon i Antonio "Toncha" Simmon, ku pa hopi aña ta dedikando nan tempu boluntariamente na nos hóbennan. Dos ruman ku no solamente a hunga baseball pero nan a trein i pasa nan konosementu na e generashonnan di pelotero i coach ku ta sigui.
Lamentablemente pa motibu di COVID-19, komishon organisadó no por organisá e edishon internashonal manera ta un kustumber di e torneo aki.
Di otro un banda e torneo di Crème de la Crème 2020 lo brinda oportunidat na tur e hóben di Minor i di Little League pa hunga weganan entre liga, lokual ta hopi importante pa e peloteronan aki su desaroyo.
Komishon a trese bon kla dilanti ku nan lo tene nan mes na rekomendashonnan di gobièrnu i ta tuma tur prekoushon nesesario rondó di COVID-19 pa por hasi e torneo aki un memorabel pa nos hóbennan.
Tur esnan ku ke apoyá e muchanan ta obligá na kumpli ku tur reglanan di prevenshon i protekshon di COVID-19. Na tur momentu e ambiente mester ta unu deportivo i nechi durante di weganan na Post 6 durante henter e torneo.
