Torneo Hope ku weganan djabièrnè i Highway Band djasabra
WILLEMSTAD- Torneo Hope ta sigi awe djabièrnè, djasabra i djadumingu na Van Engelen Ballpark. Djasabra di 6 pa 9 Highway Band lo animá esnan presente. Awenochi tin dos wega programá riba tereno A. Pa 8’or FDDK ku tin rèkòrt di 3-0 lo topa ku Keyfin ku tambe ta invikto den e kategoria Soshal Maskulino. Despues pa 9.30’or ta CITCO (1-1) lo ta kontra Kooyman (0-2) .
VVRP ta gana Aqualectra i Polis ta derotá Belastingdienst den Torneo Hope 2025
WILLEMSTAD – Torneo Hope 2025 a sigi ku su di dos wikènt djasabra i djadumingu último na Van Engelen Ballpark. Tabatin 28 wega djasabra i 14 wega djadumingu riba tereno A i tereno B. VVRP ku a pèrdè ku skor feros kontra di SVB un siman promé a bini duru bèk pa gana di Aqualectra 2 ku skor di 21-11.
Polis den un wega bon bringá a gana di Belastingdienst ku skor di 14-10. Djasabra siman pasá tabatin animashon di Dolce Band ku a zona den gran forma i deleitá esnan presente ku tremendo músika. Nos tin hopi resultado di weganan di wikènt kombiná ku pòtrèt.
RESULTADONAN (soshal maskulino)
VVRP 21, Aqualectra 11
Brandweer 17, SVB 10
SOAB 14, BDC/Ennia 11
Keyfin 13, Selikor 10
FDDK 17, Jansen & de Jongh 4
Polis/KPC 14, Belastingdienst 10
Aqualectra 1 10, MCB 6
SDKK/Dammers 16, CGF/FGC 1
ORCO/SSC 6, Kooyman 5
Keyfin 8, Jansen & De Jongh 5
Belastingdienst 15, Selikor 5
SOAB 10, CGA 5
FDDK 20, Polis /KPC 5
CITCO 12, ORCO SSC 8
SBAB 16, Douane 7
MAS INFORASHON DI SÒFTBÒL I BEISBÒL
Fanátikonan di Deporte Kòrsou, bonochi. Pabien na pueblo di Kòrsou ku a bai urna siman pasa djabièrnè i mayoria a skohe ku ta MFK nan ke pa goberná e próksimo 4 añanan. Pabien na MFK ku un viktoria abrumador di 41638 voto bon pa 13 asiento. Pabien tambe na tur partido ku a logra asiento den Staten i esnan ku no a logra, bai bèk den boso seno i wak si ta keda purba den futuro. Laga nos ban pa deporte i e deportenan ku nos ta kubri ku ta Sóftbòl i Beisbòl. Torneo Hope i Torneo Boy Constancia a sigi den wikènt ku weganan na Van Engelen Ballpark i den Stadion Post 6.
* * * * *
Parse ku dos siman pasá tabatin apertura di Diamond Stars League na Sam Bunting Ballpark na Brievengat. Aña pasá ekipo Rising Phoenix a titulá kampion di e liga i a sali den gran forma atrobe i tin rèkòrt di 3 ganá i 0 pèrdí. Na di dos lugá ta Treasure New Era ku tin 2-0, Nos Goso 1-1, Mas Goso 0-2 i The Fighters 0-3. E liga ta sigi ku weganan riba djabièrnè i djasabra na Sam Bunting Ballpark. Den kurso di siman nos tin detaye i numeritonan di e weganan ku a tuma lugá wikènt pasá.
* * * * *
Nos tin hopi resultado di weganan di Hope ku a tuma lugá wikènt pasá. Ekipo VVRP ku a pèrdè ku skor grandi kontra SVB den e promé wikènt di Torneo Hope a bini bèk duru i gana Aqualectra 2 ku skor di 21-11. Gustin Ersilia a dal 3 homerun pa e ekipo di VVRP den e viktoria. VVRP tin algun hungadó di nòmber, entre otro Rydell ‘Bieu’ Isabella , Skippy Sambo, Dwigno Puriel, Randall Constancia i Felip Guanipa. Den un partido bon bringá ekipo Polis a gana di Belastingdienst ku skor di 14-10. Polis su rekòrt a bira 1-1 miéntras Belastingdienst kai na 0-2. Te ku djasabra, djadumingu Polis a pèrdè i Belastingdienst a gana.
* * * * *
Pa loke ta trata weganan di Torneo Boy Constancia ekipo CRU a gana di Polis ku skor 8-7 den e kategoria 40+ Soshal. Jandoret Raiders a gana di Pitufos 11-8. Wikènt benidero e torneo ta yega na su fin. Djasabra ekiponan ku falta un wega mas lo hunga i djadumingu tin final den 4 diferente kategoria. Torneo organisá pa Pitufos i dediká na un gran hungadó i persona ku na 2024 a bai laga nos ku ta Raymond’ Boy’ Constancia. Den kurso di siman nos lo tin tur resultado.
* * * * *
Tin indikashon ku lo manda e play-off di Beisbòl Veterano 40+ ku algun siman atras. Ekiponan a pidi pa manda e skema mas atras pa duna nan chèns pa train i kai den forma. Nos ta kere mas bien ku tin masha hopi hungadó ta moviendo den Torneo Hope i lo preferá di kaba ku Torneo Hope promé ku nan bai hunga beisbòl. Ekiponan ku a klasifiká ta Quality Stars, Santa Maria Pirates, Isla Crackers i por último ekipo Yesterday pa medio di protesta. No a tende nada mas ofishal di Santa Rosa Memories i direktiva di BEVEKO ku a ratifiká e desishon di e komishon di apelashon, ke mèn play-off lo bai start pronto entre e promé 4 ekiponan riba e standing final manera ariba menshoná.
* * * * *
Djadumingu 23 di mart tabatin weganan di 40+ i 50+ den un torneo na Maria Mai Ballpark aya na Aruba. Ekiponan manera Survival, Yoyo Power, Piratas, Survival 40+, Legends, Quisqueya, Leftovers 40+ (tim di Joseph Everon) i Braves tabata den akshon aya na Aruba. Pa hopi aña Aruba tabata hunga torneo so, pero despues a start ku e kampionatonan espeshalmente di 40, 50 i 60. Den 2025 tambe nos lo sigui e desaroyonan di Sòftbòl i tambe Beisbòl Veterano na Aruba. Saludo pa èks gobernadó Freddys Refunjol ku semper ta manda informashonnan asertá pa nos.
* * * * *
Nos ta pendiente di moveshonnan di FEBEKO pa loke ta trata kampionato 2025. Kampionato Dòbel A , Klase A i Hubenil. Ultimo aña torneo komersial a krese formal i vários hungadó di Beisbòl Klase A i Dòbel A ta afiliá na ekiponan Soshal Open pa por sigi move kaminda tin mas fanátiko ta bin wak wega. Mester bisa ku nos Beisbòl Dòbel A ta kargá ku èks profeshonalnan ku ta hasiendo un bon trabou den nos Beisbòl. Nos ta keda te aki pa awe i te mayan ku Poder di Dios.
