Torneo kampionnan 60+ vs 50+ awe den Frank Curiel Ballpark i awe lo start ku resumen Slowpitch 2024
Nos Tambe Por i Jaws 60+ lo topa ku Baranka i Ban Serio 50+
WILLEMSTAD- Djasabra 14 di desèmber lo tin tres wega amistoso na Frank Curiel Ballpark. Ekiponan finalista di Liga 60, Nos Tambe Por i Jaws lo topa ku finalistanan di 50+ ku ta Baranka i Ban Serio. Ta trata aki di un torneo amistoso komo fundraising pa ekipo Nos Tambe Por ku ta kampion Liga 60 di 2024.
Pa 1’or lo hunga Jaws (supkampion 60+) kontra di Ban Serio (supkampion 50+) i pa 3’or Nos Tambe Por (kampion 60+) lo topa ku Baranka (kampion 50+). Pa 5’or lo tin e gran final entre e ganadónan. Bar i kushina lo ta bon surti. Ta spera tur fanátiko di Sòftbòl Slowpitch i Deporte en general.
Resumen Liga di Slowpitch 2024
Amstel Bright Premier Cup tabata promé kompetensia di Slowpitch 2024.
WILLEMSTAD- E promé kompetensia di Slowpitch tabata Amstel Bright Premier Cup ku a start den luna di febrüari i despues di 4 wikènt di kompetensia e torneo a terminá dia 10 di mart ku kampionnan den e sigiente kategorianan. Jaws (60+), Jandoret Raiders (50+), Bombers (40+),Brandweer (Soshal Maskulino), Chonchi’s (Soshal Open) i COED (Open), Swift (Modified). ADC (Coed Corporate). Grupo Ritmiko Grik i Icons tabata presente pa animá. Un públiko grandísimo tabata presente na final.
Mas resumen 2024
Torneo Hope organisá pa Van Engelen Foundation tabata eksitoso atrobe den 2024
WILLEMSTAD- Awe nos ta sigi ku resumen Sòftbòl Slowpitch di 2024. Nos lo sigi den e dianan benidero ku e resumen i spera di kaba promé ku Pasku. Awe nos ta sigi ku e torneo mas popular di Sòftbòl Slowpitch/komersial ku ta Torneo Hope. Torneo Hope 2024 a terminá den gran forma riba un djarason Dia di Obrero na Van Engelen Ballpark. For di mainta 10’or tabatin weganan final te ku den oranan di anochi. Ekiponan Polis 40+, Fire Team, The Living Legends, Onderwijs GSH/HICC, Brandweer i ADC/CMC/Brandweer a bira kampion den nan respektivo kategoría. Un públiko grandísimo tabata presente na Van Engelen Ballpark pa mira e finalnan di Torneo Hope 2024. Tabatin animashon di Oriri ku a animá e públiko presente den gran forma. Despues a sigi entrega di premio individual i di ekiponan.
RESULTADONAN
KPC (40+) 7, Flow/Selikor 5;
The Fire Team 8, Chonchies 6 (COED Open);
The Living Legends 8, Among Us 6 (Soshal Open);
Onderwijs /GSH/HICC 3, MCB 2 (COED);
SOV Brandweer 7, Aqualectra 6 (Soshal Maskulino);
ADC/CMC/Brandweer 12, SBAB (Soshal Femenino) 2
Resumen 2024 (Little League)
Montanja Ariba kampion Minor i Montanja Abou kampion Little Torneo FABB
WILLEMSTAD – Djadumingu 21 di yanüari 2024, Torneo di Minor/Little League organisá pa Fundashon Akademia di Beisbòl Brievengat (FABB) a terminá ku partisipashon di ekiponan di Minor i Little di Aruba. Ekipo Montanja Ariba a bira kampion den Minor ganando Aruba Noord 9-0. Ekipo Montanja Abou Little a gana di Montanja Ariba ku skor di 2-1 pa bira kampion den Little. Despues di wega tabatin entrega di premio den presensia di Minister di Enseñansa, Siensia, Kultura i Deporte sr. Van Heydoorn, Mark ‘Gordo’ van Zanten na ken e torneo ta dediká i dirigentenan di FABB. Dimes den nos edishon di Deporte nos tabatin entrega di premio di ekipo i premionan individual ku vários pòtrèt.
Hungadónan ku a risibí premio individual den Minor tabata Kampion Bate: Shurandy De Roon Pieters (Brievengat), Xiaejay Genaro (Montanja Ariba), Yerick Griffith (Montanja Ariba). Den Little League tabata D’Shawn Mills (Montanja Ariba), D’Harvion Haard (Trai Seru), Gianiro Martina (Montanja Abou), Gideon Jorge James.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bondia i felis wikènt. Nos a drenta e fin di siman kaminda lo tin e último aktividat riba tereno pa loke ta trata Sòftbòl Slowpitch den 2024. Djasabra tin un tremendo torneo kaminda ekiponan kampion di 50 i 60+ lo topa otro den Frank Curiel Ballpark. Propaganda a kuminsá kore na radio i riba medionan soshal. Den e promé wega ekipo Jaws supkampion di 60+ lo topa ku Ban Serio supkampion 50+. Den wega number 2 Nos Tambe Por kampion 60+ lo dal den Baranka kampion 50+. Bar i kushina lo ta bon surtí.
* * * * *
Nos a risibí informashon ku Tyron de Palm di Jaws 60+ lo move pa Los Amigos. Nos a skibi djarason ku Tyron de Palm a bai Lions huntu ku su amigu Fransje Lambertina. Ayera nos a manda un mensahe pa Tyron ku a bisa ku ta Los Amigos e ta bai hunga Sòftbòl 60+ den 2025. Tyron a kumpli 60 aña den 2024, ke mèn e lo por hunga fásil sin problema. Manera a bira konosí entrante 2025 tur hungadó mester tin 60 aña kompletu pa hunga den 60+ Sòftbòl.
* * * * *
Lesley Fer hòmber grandi den Gobièrnu i den Jaws 60+ i 50+ lo move for di e ekipo Jaws 60+. Lesley no gusta kos di muchu pleitamentu. Riba nivel di 60+ mester ta trankil i por dibertí. Naturalmente ta bai pa gana, pero si no gana, kosnan no mester bira asina ku ta pleita i kasi falta rèspèt pa otro. Ke mèn, ta manera nos a skibi djasabra siman pasá, esta exodus formal for di Jaws 60+. Wimbert Hato hòmber klave a bai su tim bieu bèk, esta Pitufos, manager Rudsel Poulina ta wanta un ratu debí na muchu pleitamentu. Fransje Lambertina a bai te ku ela debutá ku Lions siman pasá.
• * * * * *
Biniendo bèk riba e wega di mayan na Frank Curiel Ballpark, ta un kos e hungadónan di 50+ lo bai hasi pa loke ta batimentu di homerun. Ban Serio 50+ kontra Jaws 60+, e wega aki lo tuma lugá 1’or di mèrdia. Hungadónan di poder di Ban Serio ta Jair Josepha, Sherdon Rombley, Eldred Estanista, Luigi Yanez, Geronimo Daflaar, Byron Kook, Miro Daal, Ludwig Pietersz ets. 3’or ta Baranka 50+ vs Nos Tambe Por 60+. Baranka tin Gregory Reina, Spin Lourens, Ramiro Balentina, Emeric Agatha, Shendy Cras, Edmar Cornelia i otronan. Interesante pa sa kon e hungadónan aki lo bati e bala moli pichá pa un 60+ den Frank Curiel Ballpark. Nos lo tei sigur pa mira kiko ta bai pasa djasabra awor.
• * * * * *
Algu di MLB. Djaweps atardi Willy Adames a firma un kontrakt di 182 mion pa 7 aña ku San Francisco Giants. Pa nos no un super star real, pero despues di dos pa tres temporada bon ku Milwaukee, e ta bira agente liber i risibí e suma respetá ei ku ta kasi 26 mion pa temporada i 7 aña sigurá. E último 3 añanan Willy Adames a bati 31, 24 i 32 homerun respektivamente i su averahe mas haltu den e último 3 añanan tabata .251. Pa loke ta trata e kontrakt ku Juan Soto a firma, ta inkreíbel i tin hopi komentario i kritika. Ta doño di ekiponan sa kiko nan ta hasi i ban spera ku Soto lo traha pa e sèn. E tim lo gana sèn nos ta kere ku mas fanátiko na tereno, benta di kamiseta i e otro tipo di merkadeonan rondo di e hungadó Soto ku a bira e pelotero mihó pagá.
• * * * * *
Juan Soto i New York Mets a yega na un akuerdo pa 765 mion pa 15 aña, ku mesora ta bira e kontrakt di mas largu i esun di mas tantu sèn den historia di Grandes Ligas. Un averahe di 51 mion pa aña, pero repartí den 15 aña naturalmente. Soto a kaba di kumpli 26 aña, ke mèn ora su kontrakt kaba Soto tin 41 aña. Hopi ta bisa ku Soto ta mas grandi ku 26 aña i ban spera ku tur kos lo sigi bon. Pa nos naturalmente un kontrakt muchu kostoso i hopi aña pa bai. Soto ta un fileadó normal, no ekstra ordinario. En todo kaso djaweps den oranan di atardi a firma e kontrakt entre Soto i New York Mets. Nos ta keda te aki pa awe i te mayan ku Poder di Dios.
