Torneo Kopa ABC 50+ organisá pa Marlins ta start awe Dia di Rei na Van Engelen Balklpark
WILLEMSTAD- Di 27 di aprel pa 2 di mei 2022 tin Kopa ABC 50+ organisá pa ekipo di Sòftbòl Marlins. 9 ekipo di Kòrsou, 2 di Aruba i 1 di Boneiru lo partisipá na e torneo. E torneo lo tuma lugá na Van Engelen Ballpark i lo hunga solamente durante dia. Awe e torneo ta start ku wega entre Flamboyan i Sluggers pa 11’or di mainta. Despues pa 1’or pm ta sigi kandela entre Baranka i Pitufos, kampion i sup kampion di Liga 50 di aña pasa.
Pa 3’or pm ekipo Lions lo topa ku Artemisia. Djaluna 25 di aprel tabatin konferensia di prensa en konekshon ku e torneo aki. E konferensia di prensa a tuma luga na Captains na Parera ku partisipashon di tur ekipo di Kòrsou. Representantenan di ekiponan a defendé nan ekipo den gran forma i tabatin basta mamamentu di gai. Ekiponan Baranka, Pitufos, Ban Serio, Lions, Marlins, Flamboyan, Sluggers, Artemisia i Jaws di tur a manda representante i espektativanan ta haltu. Astros i Stingers di Aruba i Dragons di Boneiru lo yega despues di djarason.
Fanátikonan di Deporte Kòrsou, bon dia. Nos tei atrobe kargá ku informashon i e dianan aki nos tin hopi informashon di Play-off Beisbòl Little League ku a start djaweps den Frank Curiel Ballpark. Extra.cw lo transmití e weganan di Little League riba e diferente plataformanan i ayera nos a debutá den gran forma ku e promé wega entre Liga Pabou i Liga Willemstad. Ayera djamars ta Liga Pariba a nòkout Liga Willemstad 11-1 den Little. Djaluna tabata Pabou ku a gana Liga Willemstad pèrtá 2-0. Djarason Dia di Rei lo ta kandela entre Liga Pabou i Liga Pariba. Djarason anochi pa 6.45 pm lo tin apertura ofishal na Frank Curiel Ballpark i riba mesun fecha den oranan di mainta na Tio Daou Ballpark.
* * * * *
Aña pasá tambe kosnan tabata kandela den Little League. Nos ta kòrda un wega ku Pariba tabata faborito i Pabou a gana 12-0 pa forsa un wega desisivo. E wega desisivo a terminá den un viktoria di 11 pa 1 pa Pabou ku despues a bin gana den e seri kontra Aruba tambe. E wega finalísimo tabata riba un djabièrnè 16 di yüli aña pasá den Stadion Post 6. E aña aki ta den Frank Curiel Ballpark lo tin un transmishon bibu di Extra.cw, you Tube, Facebook, Extra Deporte ets.
* * * * *
Durante e Konferensia di Prensa manager di Minor Pabou ku ta Frankie Confesor a bisa ku Minor tin 5 aña sigí ta bira kampoion. Ta for di momentu ku Frankie Confesor a tuma over nunka mas Minor Pabou a pèrdè e play-off. Promé ku esei tabata Elmer Koeiman ku tabata dominá komo manager ku su selekshonnan di Pariba. Hopi atenshon mes play-off Little League ta lanta den tur nivel i manera semper e kategoría Little di 11 i 12 aña ta esun ku ta hala mas atenshon.
* * * * *
Nos ta ripití e sedenan pa mayor i fanátikonan kuminsá prepará pa bai den region. Little League (11-12) lo ta na Punta Cana di 5 pa 10 di yüli. Intermediate (11-13) lo ta na Kòrsou di 26 di yüni pa 3 di yüli. Junior (13-14) lo tuma lugá na Caguas (Puerto Rico di 8 pa 17 di yüli. Finalmente kategoría Senior (15-16) Guayama, Puerto Rico di 23 pa 30 di yüli 2022. Minor lo ta na Puerto Rico i nos a keda di bai chèk e fechanan serka Curacao Little League Foundation i District Administrator.
* * * * *
Ban un ratu pa Sòftbòl Slowpitch. Djaluna anochi ekipo Marlins tabatin su Konferensia di Prensa kaminda spònser Distribier a dirigí palabra i despues dirigentenan di Marlins, organisadó di Kopa ABC, a dirigí palabra. Representante di timnan tambe a presentá nan ekipo i por spera un torneo hopi kayente kaminda lo bai tin transmishon live via Facebook. Ekiponan Baranka, Pitufos, Ban Serio, Lions, Marlins, Jaws, Flamboyan, Sluggers i Artemisia lo kompetí. Patrick ‘Chape’ Elisa tabata maestro di seremonia ayera durante e Konferensia di Prensa. Djaweps nos tin mas detaye, debí ku mayan ta Dia di Rei i no tin korant. Kòrda ku djarason 27 di aprel e torneo ta start ku 3 wega. 11’or ta Flamboyan vs Sluggers, 13.00 Baranka kontra Pitufos i 15.00 ta Lions vs Artemisia.
* * * * *
Torneo Hope a sigi ku algun wega riba djadumingu 24 di aprel. Douane Cap a gana Building Depot ku skor di 8 pa 3. E tim di Douane Cap a bini ta duna bon presentashon i tin rekòrt di 2-2 ku bon chèns di klasifikashon. EWT a gana Building Depot 13 pa 7 den COED djadumingu. Wikènt benidero no tin wega di Torneo Hope i ta Torneo Kopa ABC 50+. Den Beisbòl Veterano Quality Stars a dal Marchena 5-1 ku picheo di Dayron Puriel i relevo di Rodney Michel. No tabatin eror den e wega ei. Isla a gana Jandoret 8 pa 1 i Santa Maria a nòkout Santa Rosa 10-0. Eldred Estanista a tira kompletu pa Santa Maria.
