Ultimo resumen di kampionnan den 2021 den Beisbòl Veterano i Slowpitch
WILLEMSTAD- Awe ta e último dia di e resumennan di Beisbòl Veterano i Sòftbòl Slowpitch. Awe nos tin Santa Rosa Memories ku a bira kampion di Reino di Beisbòl Veterano, sigi pa Baranka ku tabata den gran forma durante henter 2021 pa kulminá komo kampion di Liga 50 i finalmente Jandoret Raiders ku a bolbe bira kampion den kategoria 50+ di Beisbòl Veterano.
Santa Rosa Memories kampion Torneo di Reino
Santa Rosa Memories a bira kampion di e torneo di Beisbòl Veterano di Reino ganando ekipo di Hulanda Curacao Legends ku skor di 10 pa 5 den final ku a tuma lugá djadumingu 7 di novèmber. Santa Rosa Memories a terminá e torneo invikto ganando di Jandoret Raiders, Marlboro i ekipo Curacao Legends den final. Ekipo Curacao Legends ku ta ekipo formá pa Yunan di Kòrsou bibá na Hulanda, a gana di Bulldogs i Blue Lotus Indians promé ku nan a klasifiká pa final. Bon públiko for di inisio di e torneo na Tio Daou Ballpark pa mira e Torneo di Reino ku a resultá un éksito rotundo. E torneo tabata organisá pa e ekipo Curacao Legends.
Baranka kampion Liga 50
Dia 4 di desèmber 2021, Baranka ku un tremendo ofensiva i picheo kompletu atrobe di Kenny Hellement ta nòkout Pitufos ku skur skor di 17 pa 6 i bira kampion di Liga 50 kampionato 2021. Bon públiko pa mira e wega finalísimo di e kampionato. Ekipo Baranka a sali hopi fuerte riba e picheo di Johan Cicilia di Pitufos i tuma un ventaha di 10-0 den promé inning ku tabata sufisiente pa bira kampion. Tur e 3 weganan di final a terminá pa nòkout. Promé wega Baranka 18, Pitufos 7. Wega 2, Pitufos 14 i Baranka 1.
Jandoret Raiders kampion Beisbòl Veterano 50+
Dia 5 di desèmber Jandoret Raiders ku 9 kareda den inning number 5 ta bòltu skor, pa gana 10-7 di Yesterday den e gran final di Beisbòl Veterano 50+ ku a tuma lugá na Vi Jansen Ballpark, kas di Beisbòl Veterano. Yesterday tabata ganá kómodamente 7 pa 1 te den di 5 inning. Ta di 4 biaha sigí ku Jandoret Raiders ta bira kampion 50+ den Beisbòl Veterano. Den e wega bálido pa di 3 lugá, ekipo Vosama ku picheo di Xaviero Avastia a gana di Sigi Hunga 8-0.
Informashon di Beisbòl i Sòftbòl
Fanátikonan di Extra Inning, bondia i felis siman. Kon a bai ku Pasku i Dianan di Fiesta. Kosnan a bai basta trankil, naturalmente medidanan a yuda tene kos trankil, ánke e parti farandulero a haña sla. E dianan aki nos ta sigi ku e último resumennan di lokenan a pasa den Slowpitch i Beisbòl Veterano durante 2021. Wild Cats a bira kampion bèk despues di 4 aña. Na 2017 Wild Cats a bira kampion ganando di Santa Maria den final i despues tabata Santa Maria ku a bira kampion na 2018 bou di direkshon di Ramiro Balentina. 2019 no tabatin un final di Beisbòl Dòbel A despues di mas ku 50 aña. 2020 tabata Santa Rosa i 2021 Wild Cats.
* * * * *
Ekiponan ku ta rumbo pa dinastía a ripití título di 2020 den 2021. Ekipo Un Kara den Liga di Nos Tur a gana nan di 3 título sigí, meskos tabata den 60+, ekipo Nos Tambe Por. Ekipo Nos Tambe Por a gana nan di 3 título sigí. Den Beisbòl Hubenil Santa Rosa a ripití komo kampion di Hubenil. Swift a bira kampion di Liga van Engelen pa di 5 aña sigí. Awor nos ta bai pa e liganan ku a konosé kampion nobo. Liga 40 Sòftbòl, Liga 50 Sòftbòl, Beisbòl Veterano, Beisbòl Dòbel A. Na momentu ku tin kampion nobo semper ta bira mas interesante e sigiente aña.
* * * * *
Nos a papia ku Song Sofia di ekipo Nos Tambe Por i ekipo Pitufos den Liga 50. Un talento èkstra ordinario ku a yega di sali Deportista di Aña na un okashon. Song tabata superstar tempu bon di Sòftbòl Fastpitch i estrea den ekipo Santa Maria Pirates den komienso di añanan 80. Song tin dos aña ta hunga den 60+ i a sali MVP di 2021. Na 2020 no tabatin MVP debí ku tabata un temporada kòrtiku i no a pone premio di MVP disponibel. Si tabatin premio pa MVP Song Sofia lo a gana sigur, pa loke ta trata e seri final. Nos a bai bèk den un artíkulo di kasi 20 aña pasá kaminda Sòftbòl a kaba di subi Liga 40 i Song Sofia tabatin un averahe di bateo di .640 (20-32) ku 9 homerun. E tempu ei Ricardo ‘Raeboy’ Elhage tabata den Catpower huntu ku Song i tabata bati .500 punto. Shaheen Elhage tambe tabata den Catpower i tabata bati algu bou di .500. Tempu bon di Liga 40 ku 8 ekipo òf mas. Aworaki tin 5 ekipo ku chèns di bira 40. Beisbòl 40+ a krese formal i kita algu di e interes di Liga 40, pero mester bisa ku Beisbòl Veterano ta hunga den wikènt i 40 Sòftbòl den siman.
* * * * *
Den añanan 2004 bin ariba algún hungadó ku tabatin basta aña na Hulanda a bin establesé nan mes na Kòrsou. Edmar Cornelia, Sendley Reina, Stanford Landburg, Julius Veeris, Ray Soerka ets. Nos ta kòrda vários di e hungadónan aki tabata bini Kòrsou ku ekipo Steen i partisipá den Torneo Kopa Joy Alberto ku tabata tumá lugá den luna di yanüari na Cirilo Chirino Ballpark. Manera nos a skibi algún dia pasá, Torneo Kopa Joy Alberto a wanta un ratu i grupo di umpire The Greatest a bini ta organisá Torneo The Greatest den luna di yanüari. E tempu ei tabatin Torneo Union Komersial organisá pa Terremaster. Torneo Union Komersial tabata tei promé ku Torneo Hope ku semper tabata hunga den mart/aprel i terminá riba Dia di Obrero of aña di La Reina (30 di aprel te tempu ei).
* * * * *
Despues di basta aña no ta un empresa lo bai organisá Torneo Hope, pero e organisashon Fundashon van Engelen Ballpark. E fundashon ta pendiente pa kuminsá yama empresa i organisashonnan ku ta bai partisipá. Pa otro aña nos lo bai bèk den tempu i menshoná nòmber di algún hungadó den Torneo SBAB i despues Hope. Nos tin pòtrèt di un ekipo Ban Bria di 2010 ku hungadónan manera Burton van der Gen, Jordan Lucas, Martha i Gino Costino. UNA Femenino (Awor Uoc) di 2010, último aña di UNA bou di maneho di Vernon Isabella ku hungadónan Femenino, Josmaye Boelijn, Milady Pereira, Stephany Emerenciana, Juretty Poulo, Rhodine Martina, Idelienne Hanst ets.
* * * * *
Dushi bai bèk den tempu ratu ratu, espeshalmente den Slowpitch i Beisbòl Veterano. Nos a dal den un artikulo kaminda Marlins a nombra un direktiva nobo na 2005. Ettienne Larmonie i Elmer Soliano a drenta direktiva di Marlins den un reunion èkstra-ordinario ku a tuma lugá na kas di Jerry Booi. Randy Bernardus (QEPD) tabata na kabes i a baha keda den direktiva despues di un ekselente trabou e tempu ei. Nos ta keda te aki pa awe.
