Umpire i skorer di Little League ta anunsiá notisia di fayesimentu di Zora Seferina
WILLEMSTAD- Ku hopi tristesa na nos kurason, komishon enkargá ku arbitrahe di Little League ta anunsiá fayesimentu i entiero di nos kerido miembro, coach, scorer, kolega, “Sra. Soraida Seferina Thode”, mihó konosí komo Zora.
Zora manera nos hopi konosé i ta yamé, a sirbi Beisbòl den tur su faseta. Aparte di tabata coach muchanan, Zora tabata skor weganan pa tene sifra di nos peloteronan. Zora a hasi un diferensia den e karera di vários mucha ku awe sea ta prospekto o a firma profeshonal.
Komo scorer hopi di nos scorernan por a siña e arte di skormentu ei serka Zora.
Apesar di e ekseso di trabou semper Zora tabata saka tempu pa yuda skor wega den tur e liganan.
Te na último aki Zora a skor penúltimo wega di Little League, na momentu ku divishonnan tabata hungando e disputa entre liganan pa gana e bandera di Little League.
Apesar ku Zora ta mayor di hopi di nos, semper Zora a dirigí su mes ku hopi rèspèt na e mucha, coach, kolega skorer, árbitro i dirigentenan di Beisbòl na tur momentu. Mundu di Beisbòl, arbitrahe spesífikamente lo sinti hopi falta di Zora.
Komishon enkargá ku arbitrahe di Little League ta pidi tur árbitro i scorer pa presentá ku kamiseta/ unifòrm di RBC na El Tributo, sala 2, djasabra awor pa 09:00 di mainta pa huntu nos rindi honor na nos kolega Soraida “Zora” Seferina Thode.
Zora Seferina
WILLEMSTAD – Djadumingu den oranan di mèrdia mundu di Beisbòl arisibí e tristu notisia ku Zora Seferina – Thode a bai sosegá. Zora pa hopi añata den Litte League Beisbòl komo skorer i coach. E ta mama di e pelotero profeshonaldi Beisbòl Darren Seferina ku ta hunga Beisbòl na Meksiko. Zora ta kasá di èkspelotero i èks hungadó di Little League Randall Seferina. Apesar di Zora sukebrante di salú ela keda skor weganan di Beisbòl Little League i tabatapresente komo skorer di weganan di play-offnan di Little League resientementeku a tuma lugá na Didi Deeds Field, Tio Daou Ballpark i Frank Curiel Ballpark.Un gran coach i skorer ku a coach varios selekshon di Minor League na Kòrsou iden eksterior. Trahadó ehemplar di Imigrashon di Kòrsou i eks Antia Hulandes pamas ku 40 aña ku resientemente a baha ku penshun. Forsa na famia i amigunan die defuntu.
MAS INFORMASHON DI S0FTBÒL I BEISBòL
Fanátikonan di Deporte Kòrsou, bonnochi i felis wikènt. Nos tei atrobe ku basta informashon di Sòftbòl i Beisbòl. Bon presentashon djarason di nos selekson nashonal di Futbòl ku un viktoria di 4-1 riba Barbados. E ekipo Barbados ku ta leu for di nos riba ranking, a lucha den e promé mitar basta bon, pero den di dos mitar nos selekshon a mustra muchu mas sigur i nos tin un direktor tékniko ku eksperensia ku kon ku bai bini ta hasi e kambionan ku mester hasi sin miedu. Por a mira klaramente ku despues di algun kambio nos selekshon a kue su ritmo di wega i gana konvinsente 4-1.
* * * * *
E gol kontra tambe no tabatin mester, debí ku e defensa a laga e bala bòns pa despues haña su mes den pèrtá i tene na kamisa di e hungadó di Barbados. Kos ta sigi djasabra na Aruba na momentu ku Kòrsou topa ku Aruba den nan lugá. Wega ku no mester ta problema pa nos, mirando e kalidat di hungadó ku Kòrsou tin, pero mester bisa ku e bala ta rondo i nos a sinti esei djarason kontra di Bahamas. Ta riba tereno e wega ta wòrdu hungá i no riba papel. Kòrsou ta na di 91 lugá, Barbados na di 177 i Aruba 193. Lista ku nos a wak di luna di aprel.
* * * * *
Awe i djasabra tin wega number 2 i number 3 entre Nos Goso i ekipo Rising Phoenix di The Diamond Stars League. E promé wega Rising Phoenix a gana relatívamente fásil ku skor di 6-1. Komentario den kaya ta mustra ku e biaha aki si, Nos Goso lo no por wanta e hubentut i e spit di e ekipo Rising Phoenix. Bon ya.. ta Kaya ta papia, pero tur kos por pasa, debí ku Nos Goso ta keda Nos Goso i nan tin dos título sigí den e dos añanan di eksistensia di The Diamond Stars League. Ta trata di un seri mihó di 5, pero tur kos por pasa. Liga di Nos Tur ta pendiente pa The Diamond Stars League terminá, pa start ku e kampionato ku lo hunga den Frank Curiel Ballpark.
* * * * *
Liga 50 ta sigi djasabra ku varios wega fèrfelu na Van Engelen Ballpark. Nada ainda di Liga Amstel tampoko Liga van Engelen. E weganan di djasabra awor den Liga 50 ta 10.00 Flamboyan – Sluggers, 12.00 Artemisia – Baranka, 14.00 Marlins – Jaws, 16.00 Catpower – Ban Serio. Ekipo Pitufos i Baranka ta invikto den Liga 50. Standing ta Pitufos 4-0, Baranka/Sharks 3-0, Marlins 2-1, Flamboyan/Gamers 2-1, Artemisia 2-1, Jaws 1-2, Catpower 1-2, Sluggers 1-2, Ban Serio 0-3 i Lions 0-4.
* * * * *
Ban un ratu pa Little League. Djasabra 8 di yüni lo hiba un gran dirigente di Little League na su último lugá di sosiegu. Ta trata aki di Zoraida Seferina – Thode, mihó konosí komo coach Zora òf Tanchi Zora ku pa mas ku 25 aña a sirbi Little League i hopi serka. Zora tabata coach di selekshon di Minor di Little League Baseball i di Beisbòl di Santa Maria i skorer di Little League. Ela duna su alma i kurpa na Little League. Akto di entiero ta djasabra 8 di yüni i ta risibí bishita di kondolensia di 9 pa 10.30 na El Tributo Otrabanda sigí pa un respòns. Despues lo hiba e defuntu na su último lugá di sosiegu na Santana Katóliko di Santa Maria. Mundu di Little League di Kòrsou ta di luto i masha hopi persona lo ta presente na El Tributo djasabra. Zora a pidi pa akto di entiero tuma lugá djasabra, p’asina su muchanan di Little League lo por hibé na su último lugá di sosiegu. Forsa un biaha mas na kasá Randall i yu Darren i demas famia.
* * * * *
Ekipo Viajeros ta na Colombia ku varios hungadó popular di Slowpitch manera entre otro, Nelly Jakoba, Cedric Curiel, Roy Jakoba, Marlon Winklaar, Aldrin Visers, Leito, Louisa, Martha, Baromeo i Maal Jonis. E tim a move djadumingu pa Cali i e torneo ta di 4 pa 9 di yüni. Den e promé partido e ekipo a gana 21-4. Di dos wega tambe nan a gana 12 pa 7. E torneo ta konta ku partisipashon di ekiponan di Baranquilla, Cali, Bogota, Aruba, Panama, San Andres ets. Keda pendiente pa mas detaye. Miéntras tantu Beisbòl Veterano ta sigi wikènt awor i Liga 60 lo sigi djadumingu awor na Frank Curiel Ballpark. Nos ta keda te aki pa awe. Te mayan ku Poder di Dios.
%20copy.jpg)
