Un Era nobo pa selekshon di Futbòl di Kòrsou i un danki na Remco Bicentini
Despedida di Remko tabata inevitabel
WILLEMSTAD - Nos tin un komunikado ku komentario di Pepi Sulvaran, analista di selekshon di Futbòl di Kòrsou. FFK a tuma despedida di Remko Bicentini. Esei tabata di spera. Tòpspòrt su regla prinsipal ta duru i kla. E úniko kos ku ta konta ta resultado i nada mas. For di momentu ku e selekshon aki yen di hungadó profeshonal a kuminsá pèrdè ku paisnan manera Indonesia i St. Kitts ku ta entre esnan mas malu na mundu, tabata difisil pa sigui riba e mes un rumbo.
No ta solamente ku nos a pèrdè, pero tabata bon kla ku Bicentini no por a motivá e selekshon aki mas i e kanselashon di hungadó tras di hungadó a pone ku e no por a kontra arestá e spiral negativo ku ‘Pantera Negra’ ta den dje. Den e wega kontra St. Kitts tabata doloroso pa mira kon un ekipo ku apenas un hungadó di nivel akseptabel, riba motivashon i deseo pa gana, a humiyá nos den porta di e torneo di mas grandi di CONCACAF.
Un selekshon sin hamber
Nos a presentá ku no ménos ku sinku hungadó ku eksperensia den e Liga mas haltu na mundo, esta Premier League Ingles, kompañá pa hungadónan ku entre otro eksperensia den Eredivisie, pero ku klaramente no tabatin ni e boluntat ni e deseo pa duna lo máksimo. E regla den futbòl no ta otro, esun na kabes mester karga e konsekuensia. Además e eskohensia di Bicentini pa keda mantené e mes hungadónan ku pa gran parti a bira veterano a kosto di hóben talentonan, a bin koste un gran parti di e sanger nobonan ku a bin selekshon ku entusiasmo, pa ripará ku no tabatin oportunidat pa nan. Esaki a pone hopi di nan bati retirada ku tur e konsekuensia ku esei tin ku ne. Lokual a sobra ta un selekshon ku un edat promedio haltu, ku no tin e ‘hamber’ mas pa entrega tur kos. E maneho aki a kosta Bicentini. No ta bai bira fásil pa gana e konfiansa bèk, pero mester purba si. Mester splika ku tin un ruta nobo i ku oportunidat pa kompeti pa tur ku logra un nivel haltu den futbòl.
Un danki na Remko
Nos no ta kere ku Bicentini a hasi nada pa malu i nos no mester lubidá ku ta kuné nos a bira kampion di Karibe. Pero aworaki e no por trèk e garoshi mas. Ta bon kla ku e no por hiba nos e sigiente nivel. E ta karesé kisas e duresa pa esei i a duna sierto hungadó demasiado konfiansa riba otronan. E preis e ta paga awor. Ku Remko tin amor pa Kòrsou ta sigur, pero den tòp di CONCACAF mester muchu mas ku esei. Bicentini a yuda pone nos riba mapa di futbòl atrobe den nos región i e meresé elogio pa esei. Ela haña su oportunidat pa regresá, pero esei no a bira un éksito.
Nos mester ta franko den esei. No ta su falta so si, e organisashon rondo di nos selekshon tambe mester mehoramentu. Pero komo úniko responsabel pa e resultadonan riba tereno, e mester karga e vra i mester sa ku den tòpspòrt si no tin resultado, bo mester prepará bo maleta. Un gradisimentu públiko di parti FFK pa tur lokual ela hasi pa selekshon ta na su luga. Mi mes ku último tempu tabata kritiko riba e maneho tékniko di selekshon ta haña ku e meresé esei komo hende tambe. Fayo nos tur por kometé den tur posishon, pero e logronan den Karibe na su man, niun hende no por kita esei. Pero awor ‘Pantera Negra’ a bai den grandi i mester a hasi algu pa kontra aresta e kaida di e selekshon.
Era Nobo
E desishon di FFK ta tuma. Awor mester wak dilanti. Nos tin potensial enorme na hungadó i mi ta konbensí ku si nos logra motiva e grupo di mas ku 20 hungadó ku tin eksperensia riba e nivel máksimo na Europa, di Liga Premier, Eredivisie, Süper Lig Turkia, Primeira Liga Portugal, Allsvenskan Suesia, Ekstraklasa Polonia i MLS kombina ku hóben talento manera entre otro, Margaritha, Severina, Robertha, Chirino, nos mester por sali bon for di Trinidad i Martinique na sèptèmber benidero den nos lucha pa keda den Liga A, ku ta tòp di CONCACAF. Mester move awor si.
E formula mester haña pa konbensé mas tantu di nan posibel. Anto ainda nos no a konta e ‘target’ nan manera Bazoer, Obispo, St. Jago i Chong entre otro. Si eksitonan bini, di mes nan ta kana drenta e trampa blou ku hel un pa un, paso ken no ke probecha e chèns pa bai mundial, e podio maksimo di futbòl. Un entrenadó ku bon nòmber den futbòl lo por yuda, pero tampoko ta un garantía, nos tin ehèmpel de sobra. Si no tin sèn di tur manera tin Dean Gorré den kas kaba, ku kon ku bai bin tin e konosementu di e situashon lokal di FFK kaba. E yabi awor mester ta, haña un bon balansa entre eksperensia i talentonan nobo. Ban wak.
%20copy.jpg)
