Urlich Snijders a pidi retiro for di Santa Maria pa bira agente liber
WILLEMSTAD- Di bon fuente Deporte Kòrsou a risibí e informashon ku e kècher estelar di Santa Maria Pirates pa hopi aña Urlich Snijders a pidi retiro. Urlich Snijders tin basta aña komo kècher estelar di Santa Maria, for di tempu ku Ramiro Balentina a retirá komo hungadó aktivo. Promé ku Ramiro Balentina retirá, Snijders i Ramiro tabata kompartí e posishon di kècher. Urlich Snijders di 35 aña tin hopi eksperensia den Beisbòl Dòbel A. Ta hungadó ku a bai College na USA i a keda di draft na 2005 i a firma ku Milwaukee Brewers.
Despues ku Snijders a keda lagá den libertat na 2008, ela hunga ku éksito na Italia pa despues regresá Kòrsou. Na 2021 Urlich a bati 2.88 ku 3 homerun i 15 RBI den 15 wega. Na 2020 e averahe tabata kasi mesun kos .289, pero ku 6 homerun i 27 empuhá den 26 wega total. 2019 tambe nos tin averahe di Urlich Snjders ku tabata .289 ku 2 homerun i 17 RBI. Un batiadó di hopi poder ku por karga un ekipo riba su skoudernan. Urlich Snijders ta hungadó di selekshon pa hopi aña. Den e wega final di e torneo di Karibe entre Cuba i Kòrsou, Urlich Snijders a bati di 4-3 ku 2 empuhá komo kècher kontra e fuerte ekipo di Cuba pa hasi Kòrsou kampion di e torneo. Kòrsou a gana e wega final dramátiko ku skor di 4-3. Un hungadó ku te ainda tin hopi adén i hopi mas pa bai. Sla pa Santa Maria rumbo pa kampionato 2022, segun nos fuente.
INFORMASHON DI BEISBÒL I SÒFTBÒL
Fanátikonan di Deporte Korsou, bon dia. Ekiponan a kuminsá train e siman aki. Tantu ekiponan di Beisbòl komo ekiponan di Sòftbòl Slowpitch. Ekiponan di Liga 50, entre otro Marlins lo kuminsá train. Varios hungadó di kaliber lo kumpli 50 aña, entre otro Djuric Pietersz ku ya ta den Baranka parse. Pitufos ta bulando den awa di Baranka pa bai ku un outfielder. Tin indikashon ku Pitufos ta bai kompetí fuerte entre e grandinan den Liga 50 pa basta ratu. Nan ta duru riba algún hungadó di Ban Serio i Ban Serio tambe riba Pitufos.
* * * * *
Siman pasá nos a pone algún detaye di e promé wega di Beisbòl di AA den SDK i nos a pone e pichernan ganadó i pèrdèdó. Awe nos tin algún di e hungadónan ku a bati promé hit, risibí promé ponche, promé base por bola, ets. Great pa nos kòrda e nòmbernan di e tempu ei. Emile Haswell promé hit, Rudsel Schmidt promé ponche, Ceryl Nicia promé robo di base i Cery Nicia promé kareda anotá. Sharon Casiano promé base por bola ku base yen. Promé double play ta di Ludwig Dalnoot pa Bencho Imperator pa Norwin Rudolf. Promé wild pitch Naai Hooi. Promé ponche tirá Renato Anasagasti, Promé base por bola intenshonal Rendi Bernadina. Promé intento di robo saká Randy Bernardus pa Siegfried Flaneur.
* * * * *
Varios di e hungadónan aki ta aktivo ainda den 60+. Emile Haswell, Naai Hooi i Renato Anasagasti den Nos Tambe Por. Rudsel Schmidt den Jaws. Ceryl Nicia inaktivo, Sharon Caciano mas ku 35 aña na Hulanda. Ludwig Dalnoot inaktivo i na Hulanda. Bencho Imperator yegando 74 aña ainda aktivo den Sòftbòl 60+. Siegfried Flaneur segun nos ta Los Amigos den 60+. Randy Bernardus a fayesé algún aña pasa. Un gran hungadó i lider den varios organisashon. Un ratu den ‘Recordar es vivir’. Datonan saká for di buki homerun di Hubert Flemming. No e datonnan di Liga 60, pero esnan di Beisbòl di aña 80 i 90.
* * * * *
Djaluna nos a skibi di Shuruendy Valeriano ku a keda laga den libertat despues di dos aña bon na República Dominicana ku organisashon Tampa Bay den Dominican Summer League. Na 2018 6 ganá i 3 pèrdí i 5 wega salbá den 18 wega den relevo, 34 inning pichá, solamente 22 hit i 9 kareda limpi i 32 ponche tirá. Kasi un ponche pa inning ku 12 base por bola. Un ERA di 2.38. Den Shuruendy Valeriano su di dos aña, aña 2019, 4 ganá i 2 pèrdí. ERA di 3.27 den 33 inning ku 44 ponche tirá i 23 base por bola. Ela terminá su karera profeshonal ku 10 ganá i 5 pèrdí. 5 wega salbá i un ERA di 2.82. Un ERA bou di 3 ta hopi bon mes. Ya asina ta bai den profeshonal i faktor suerte tambe ta konta hopi . A laga Shuruendy den libertat na ougùstùs 2019. Te awe e tremendo picher aki no a tende pakiko nan a lagé den libertat.
* * * * *
Ekipo Royal Scorpions ta hopi trankil ainda, apesar ku nan a pèrdè basta hungadó espeshalmente picher. Segun fuentenan di Royal Scorpions nan a pèrdè varios picher ku no a tira masha inning den 2021. Ruderly Manuel, Shuruendy Valeriano i Gavanee Virginie no a tira hopi inning. Royal Scorpions lo bai duru riba Jamanika, ku ta e picher ku ta tirando mas inning ku tur otro picher, for di tempu ku ela bini bèk for di Hulanda i tabata picha ku Santa Rosa Indians. Un grandi di Santa Maria ta pendiente pa pidi retiro. Nos ta keda te aki pa awe.
