Wega amistoso entre Aruba i ekiponan ku mester a bai Sint Maarten
WILLEMSTAD- Djasabra 22 di yüni na Van Engelen Ballpark tereno B tin wega amistoso entre ekiponan di Sòftbòl Femenino veterano ku mester a bai Sint Maarten pa e torneo organisá pa ekipo Upsetters. Ekiponan Mi Deseo i Treasure lo topa ku Splash di Aruba. Weganan ta 4’or Splash (Aruba) vs Mi Deseo i 5.30 Splash vs Treasure. Riba tereno A lo tin 4 wega di kampionato regular di Liga 50.
Skema Liga 50
10.00 Ban Serio – Flamboyan.
12.00 Baranka – Jaws.
14.00 Artemisia – Marlins.
16.00 Pitufos – Catpower.
Beisbol Veterano ta sigi wikènt benidero despues di reunion
WILLEMSTAD- Djaweps tabatin reunion di Beisbòl Veterano na Landhuis Salinja. Praktikamente tur ekipo tabatin representante den e reunion general urgente aki. A yega na un akuerdo ku kuerpo di umpire USAC i lo tin un umpire sigur pa kada wega den wikèntnan benidero.
Liga 50 di Beisbol Veterano tin hopi interes i lo tin 6 ekipo e aña aki kompará ku 4 di aña pasa. Kampionato di Beisbòl Veterano 50+ lo start dia 14 di yüli. Problema di kuementu di bala bai kune ta sigi serio i direktiva ta pidi tur fanátiko i hungadó pa por fabor trese e balanan ku bai for di tereno bèk pa umpirenan. BEVEKO ta buskando otro vèltnan (parkenan) pa bai pa asina por haña bar i kubri gastunan. Ekipo Flamingo a keda saka for di kampionato. Pa di 2 buelta lo traha un skema nobo pero e skema actual ta keda manera e ta.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bonochi i felis wikènt. Liga 50 i Liga 60 lo sigi den wikènt aki ku weganan na Van Engelen Ballpark i Frank Curiel Ballpark respektivamente. Beisbòl Veterano lo sigi djasabra i djadumingu na Vi Jansen Ballpark. Djaweps 20 di yüni mester tabatin reunion ku varios punto di agenda di Beisbòl Veterano. Punto di agenda tabata situashon di balanan, di umpire, di ekipo Flamingos, skema Liga 50 di Beisbòl, e fecha tentativo pa start Liga 50. Situashon ta tenso pa loke ta trata umpire pa wega i asuntu di balanan tambe. Hopi hende grandi ta kue bala bai kuné òf ta laga hóbennan kue bala trese pa nan. BEVEKO ta pidi pa por fabor trese e balanan bèk pa garantisá kontinuashon di e weganan.
* * * * *
Pa loke trata Beisbòl Dòbel A, ekipo Royal Scorpions a start kayente ku dos viktoria riba dos ekipo grandi. Viktoria di 3-1 djasabra 15 di yüni kontra di Santa Rosa Indians i despues viktoria pèrtá atrobe di 3-2 kontra di Wild Cats. Djaweps Groot Kwartier mester a enfrentá Santa Rosa Indians. Santa Rosa a gana ku skor di 5 pa 1 i Jordan Lucas tabata picher ganado i ‘player of the game’. Nos a tende manager di Groot Kwartier, Hensley Josephina den un entrevista na radio i e tabatin hopi sigur den su ekipo. Promé ku e wega di djaweps ta solamente Royal Scorpions i Groot Kwartier tabata invikto. E standing promé ku e weganan di djaweps ta Royal Scorpions 2-0, Groot Kwartier 1-0 ( a bira 1-1), Wild Cats 1-1, Santa Maria 1-1, Santa Rosa 0-1 ( a bira 1-1) i Marchena Braves 0-2. Marchena ta den sótano, pero nan a pèrdè dos wega ku skor pèrtá.
* * * * *
Jurickson Profar, nos estrea ta den gran forma e aña aki den MLB. Jurickson Profar tin un average di .323 ku 10 homerun, 47 RBI i 12 doblete den 260 turno. Jurickson promé ku weganan di djaweps tabata lider den average den tur dos liga. Jurickson Profar di 31 aña a debutá dia 2 di sèptèmber 2012 na edat di 19 aña ku Texas Rangers i a konektá homerun den su promé turno. Den On base Percentage Jurickson Profar ta number 3 tras di grandinan di Yankees manera Juan Soto i Aron Judge. Jurickson Profar ta number 1 pa loke ta trata votonan pa outfielder di Wega di Strea den Liga Nashonal. Tremendo aña i Jurickson lo ta agente liber na final di temporada.
* * * * *
E torneo di Sòftbòl Femenino Veterano na Sint Maarten organisá pa ekipo Upsetters a keda suspendé, debí ku ekiponan di Kòrsou lo no por yega. 4 ekipo di Kòrsou i ekiponan di Sint Maarten, Aruba, Boneiru i Hulanda pa yega nèt 8 ekipo mester a lucha di 19 pa 23 di yüni. Hopi yamer mes mes e asuntu aki ta i e partisipantenan ku mester a biaha ku Jet Air no a haña nan sèn bèk ainda. Inkreibel, e asuntunan aki mester kaba awor si ku último tempu kompanianan di aviashon lokal ta kibra i laga hende na Kòrsou òf den eksterior. Kon por ta tuma sèn algun dia promé, anto ta bati bankrut. Ban serio si, bankrut sa kai onverwagt? Asina aki. Ban hopi hopi serio mes.
* * * * *
Vários hungadó hóben profeshonal di nos ta moviendo na República Dominicana. Asina tantu ku nos a pèrdè konteo un ratu. Curley Martha, Jurdrick Profar, Shendrion Martinus, Clay Winklaar, Peson Rivierre, Deshando Tromp, Nathanael Cijntje i Danery Meyer. Ta algun ku firma e aña aki. Honkbalsite.nl ku tabata up to date tambe a pèrdè konteo i no ta up to date. Curley Martha ta batiendo .255, Shendrion Martinus .308, Judrick Profar .324, Peson Revierre .346, Danery Meyer, picher ERA di 3.00. Nathanael Cijnte .333. Nos ta fásil den Beisbòl Profeshonal i sigur den Dominican Summer League. Ta trabou duru tin.
* * * * *
Liga di Nos Tur ta pendiente pa start dia 5 di yüli 2024. 4 ekipo lo partisipá na e kampionato, entre otro Sin Stress ku ta kampion, Un Kara, Shining Stars i Join Me. Weganan di Liga 60 pa djadumingu ta 11.00 Nos Power vs Jaws, wega ku por bira kandela, despues pa 1’or ta Lions vs Los Amigos i finalmente Sluggers kontra Nos Tambe Por pa 3’or pm. Ta pendiente pa weganan di ekiponan ku a bai Sint Maarten ku lo hunga djasabra kontra Aruba na Van Engelen Ballpark. Nos ta keda te aki pa awe. Te djaluna ku Poder di Dios.
%20copy.jpg)
