Wild Cats Hubenil ku unifòrm nobo i apertura di Liga 60 djadumingu 26 di mei
WILLEMSTAD – Ekipo Wild Cats Hubenil resientemente a tuma unifòrm nobo serka spònser Essex na Nieuwe Haven. Riba pòtrèt por mira manager Nathan Doran i gerensha di Essex i hungadónan di Wild Cats. Kampionato di Hubenil ta start djasabra. Exito pa ekipo Wild Cats.
Sòftbòl Liga 60 ta start djadumingu na Frank Curiel Ballpark
WILLEMSTAD- Djadumingu 26 di mei kampionato di Sòftbòl Liga 60 ta start na Frank Curiel Ballpark. E apertura ofishal lo ta 1’or pm i lo ta dediká na 3 baluarte. Ta trata di Nelson Candelaria, Irwin Leito i Lionel Fransinet na ken e kampionato ta dediká. E kampionato lo bai dos buelta, sigí pa play-off sistema page i tur wega ta tuma lugá na Frank Curiel Ballpark. Nos tin e programa di apertura. Pa 1’or pm hungadónan di e ekiponan ta kana drenta parke ku nan blasnan. Mc Wimbert Hato ta yama e baluartenan, Nelson Candelaria, Irwin Leito i Lionel Fransinet ku nan famia pa subi tereno huntu ku Direktiva di Liga 60 i presentá nan na presentenan. Segidamente Himno di Kòrsou. Orashon di parti di Elvis Jacobus. Presentashon di CV di e baluartenan un pa un i entrega di plakat kombiná ku entrega di un akto floral na nan señora. Saké di Bala dor di e baluartenan. Palabra di presidente di Liga 60, sr. Urvin Martina. Despues blasnan ta bai laira. Playball pe wega entre Nos Power kontra di Nos Tambe Por. Otro weganan ta 11’or Curacao Super Stars – Sluggers i 3’or Jaws vs Lions.
Nos Goso Gai Lihe ta pika dilant den playoff semifinal
WILLEMSTAD - Nos Goso a gana di Treasure ku skor di 11-5 i pika dilanti den playoff semifinal di The Diamond All Stars League. Djabièrnè Nos Goso a klasifiká ganando di The Fighters sigiendo e wega ku e keda protesta. Semifinal a start djasabra 25 di mei i Nos Goso kampion dos biaha di Diamond All Stars League a gana den un wega ku a bai 6 inning. Carlinjte Cloepa tabata e picher ganado i Fayna de Mei a bati di 4-2. Wega number 2 ta e semi-final miho di 3 ta sigi djabièrnè 31 di mei.
MAS INFORMASHON DI SÒFTB0L I BEISBÒL
Lesadónan di Deporte Kòrsou, bon tardi i felis siman. Nos a pasa un wikènt kaminda e deportenan popular ku a sigi ta riba full speed ku temporada nobo. Liga 50 a sigi djasabra na Van Engelen Ballpark ku 4 wega i e wega kandela ta 4’or kaminda Ban Serio super kampion di Kopa ABC&S i kampion di 50+ a topa ku Marlins. Na Aruba den Kopa ABC&S den semi-final djadumingu 12 di mei Ban Serio a saka Marlins afó pa despues gana e fuerte ekipo Astros pa bira kampion. Resientemente manager di e ekipo Ban Serio Jair Josepha a entregá e ekipo na Jerry Booi ku no a move ku e ekipo pa Aruba. Den oranan di mainta djasabra ekipo Pitufos ku ta sigi gana a dal Jaws ku skor di 11 pa 5. Marlins a laga Ban Sero den tereno riba hit di Mairon Martinus ganando ku skor di 7-6. Flamboyan Gamers a dal Lions 14-9. Artemisia a gana Catpower 7-6. Ku picheo di Fardy Lard nan a laga Catpower den tereno. Base por bola ku base yen a terminá e wega.
* * * * *
Nos tin algu di resultadonan di e siman promé tambe. Baranka a dal Catpower 7 pa 1 ku picheo atrobe di Kenny Hellement ku a bai ruta kompletu. Gregory Bito bèk den gran forma di 2-2. Joseph Everon ku tei bèk a risibí 3 base por bola. Isaac ‘Sjaki’ Francees tabata e picher pèrdèdó. Vários hungadó ku ta den Nos Power òf otro ekiponan di 60+ manera entre otro Hendrik Gabriel, Wendell van het Kruys, Earl Virginia, Rudsel Schmidt ets.
* * * * *
Pitufos a pasa riba Artemisia ganando 10 pa 1 despues di un tremendo homenahe pa Bobbel Hamson na ken e kampionato ta dediká. Sidney Lourens tabata e picher ganadó. Robertson ‘Tom Jr.’ Josefa a dal un homerun i segun nos promé homerun bula waya di kampionato 2024. Hubert Sakoetoe a bati di 4-4. Pitufos a dal 14 hit i hasi 3 eror. Sluggers a gana Lions 13 pa 6. Claifson Domacasse a gana e wega ku relevo di Ludwig Jonis, Frensel Esclodina a bati di 3-2, Raymond Lieuw (veteranisimo 60+) di 2-2. Juny Marselia otro 60+ di 2-2, Jonis di 1-1. Geralton Martha tabata e picher pèrdèdó pa ekipo Lions. Robert Trinidad di 3-3, Ronchel Daal di 2-2. Nelly Jakoba di 2-1. Lions tambe ku varios 60+ den akshon den Liga 50.
* * * * *
Flamboyan Gamers a zona un kampanaso riba Jaws ganando 5-3. Tene kuenta ku e ekipo a bira Flamboyan Gamers den 2024. Den komienso e ekipo tabata Flamboyan, despues e ekipo a bira Flamboyan Tigers i den 2024 ta Flamboyan Gamers. Algun siman pasá a hiba Michel Daou, un dje grandinan di Flamboyan di tur tempu, na su último lugá di sosiegu. Un tremendo hungadó i kompañero di ekipo, gran poder na bate, gran outfielder tantu den Beisbòl komo den Slowpitch. E tabata picher tambe den su karera den Dòbel A. Den Flamboyan ela hunga tersera base, shortstop i outfielder den gran forma. Hòmber ku a bai Olimpiada na mas ku un okashon representando e deporte tiru. Stanley Palm a bati di 3-2, Polonius di 3-2, David Rodriguez di 3-1. Rudney Garmers tabata e picher ganadó di e wega ei.
* * * * *
E siman aki un grandi di Sòftbòl Slowpitch i bon hungadó di Beisbòl Veterano Golbert ‘Bibi’ Gonet a fayesé. Tremendo persona ku nos a konosé hopi djaserka ku semper ta kla pa animá i apoyá tur hende. Den farandula i músika no ta kos di papia mes. Ta hungadó ku nos a papia di e wega kuné hopi. Bibi Gonet tabata militá den ekipo Marlins di 50+ i ántes den vários ekipo di Slowpitch, entre otro Run Runners. E tabata den Santa Maria Pirates Veterano for di tempu ela kumpli 40 aña. Un gran baluarte di músika na Kòrsou i un biaha mas tremendo kabayero ku ora mester duna su opinion e ta duné flèt. Kondolensia i forsa na famia i amigunan di Bibi Gonet. Akto di entiero ta djaluna 27 di mei.
* * * * *
Beisbòl Hubenil a start e wikènt aki ku partisipashon di Royal Scorpions, Wild Cats, Santa Maria, Marchena Braves, Groot Kwartier i Santa Rosa. Liga 60 ta start djadumingu 26 di mei na Frank Curiel Ballpark. Pa 1’or tin un seremonia i apertura ofishal kaminda lo duna honor na baluartenan Nelson Candelaria, Irwin Leito i Lionel Fransinet na kendenan e kampionato ta dediká. Djadumingu awor tin 3 wega. Nos ta keda te aki pa awe. Te djaluna ku Poder di Dios.
%20copy.jpg)
