Wild Cats kampion Beisbòl Dòbel A 2021
WILLEMSTAD- Wild Cats ku picheo kombiná di Risandro Pastor, Shurensley Daantji i Alexander Rodriguez a gana Royal Scorpions ku skor di 4-3 i bira kampion Beisbòl Dòbel A 2021. Bon públiko presente na Tio Daou Ballpark pa mira wega number 5 di e final di Beisbòl Dòbel A. Wild Cats a gana e seri final 4-1, despues di a gana e promé tres weganan, pèrdè wega number 4 i gana wega number 5 pèrtá. Despues di wega tabatin entrega di premio. Tabata e di 18 título di Wild Cats.
WEGA FINAL
Wild Cats komo ekipo di kas ta habri di Risandro Pastor i Royal Scorpions ku e hóben Steaven Amorsingh. Royal Scorpions komo ekipo di bishita i Wild Cats komo ekipo di kas no ta skor den promé inning. Royal Scorpions ta bai ariba 1-0 riba homerun ku base bashi di Edinho Meyer pa left.
E wega ta keda 1-0 te den kabes di e di tres inning kaminda Ardley Jansen, playing manager di Wild Cats ta bati hit pa lèft pa Shurendell Mujica nota kareda di empate (1-1). Den kabes di e di 4 inning Reyhan Fecunda batiadó slengu ta konektá homerun pa lèft pa Royal Scorpions bai ariba 2-1.
Wild Cats ta kontestá i bai ariba 4-2 riba hit di Alexander Rodriguez pa hasi e wega 2-2 i despues hit pa center di Ardley Jansen ku a empuhá dos kareda. Tur e tres karedanan aki a nota despues ku e picheo di Royal Scorpions (Amorsing) a sali saka e promé dos batiadónan out.
Den kabes di e di 6 inning Scorpions ta kòrta bentaha riba hit di senter di Raywendley van Gurp pa Reyhan Fecunda nota kareda number 3 pa Royal Scorpions. Shurensley Daantji ta drenta na lugá di Risandro Pastor i poncha e batiadó Stephan Vidal ku koredó na segunda i tersera. No ta bini anotashon mas den e wega. Den di 8 inning Stephan Vidal ta dal hit pa lèft, leftfielder Rojean Cleofa ta tira pa kècher Reangelo Beaumont ku tira pa segunda i saka Raywendley van Gurp ku a habri hopi na segunda out. Out krusial debí ku Royal Scorpions lo tabatin base yen i Edinho Meyer tabata bin bati.
Den di 9 Alexander Rodriguez ta drenta saka promé out. Curtney Doran ta dal hit, pero e picher slengu Alexander Rodriguez ta saka Curtje Doran out despues na primera den un tremendo pick-off. Reyhand Fecunda ta poncha kantá pa terminá e partido.
NUMERITONAN
Wild Cats a nota na 4 okashon bati 7 hit i hunga sin eror. Risandro Pastor a gana. Ela tira 5.2 inning (117 lansamentu) tuma 3 kareda limpi. Shurensley Daanjti a tira 2.1 inning sin tuma kareda i Alexander Rodriguez un inning sin tuma kareda. Ardley Jansen a bati di 4-2 ku 2 RBI, Randolph Kirindongo di 4-2.
Royal Scorpions a bati 11 hit i hasi 1 eror. Steaven Amorsingh tabata e picher pèrdèdó. Ela picha 3.2 inning (85 lansamentu) i tuma 4 kareda limpi riba 4 hit. Cerilio Soleana a tuma dos hit sin tuma kareda. Temesh Lourens ta tira 4.1 inning sin tuma kareda. Raywendley van Gurp i Reyhan Fecunda a bati di 4-2, Stephan VidaI i Curtney Doran di 5-2, Raywendley van Gurp i Reyhand Fecunda a konektá homerun solitario.
