Wild Cats ta dal Santa Maria i pasa pa final di Beisbòl Dòbel A 2020
WILLEMSTAD- Wild Cats ku bon picheo di Risandro Pastor, relevo di Ruwensley Bonifacio i Jair Jurrjens ta gana Santa Maria ku skor di 8-6 djabièrnè anochi den Tio Daou Ballpark. Ku e viktoria aki Wild Cats lo topa ku Santa Rosa Indians den final di Beisbòl Dòbel A. Risandro Pastor a tira 5 inning i un tèrsio, tuma 3 kareda, riba 3 hit i dos base por bola. E relevista Ruwensley Bonifacio a tira 2 inning i un tersio. Jair a saka 3 out den di 9 inning i haña e wega salba. Shurendell Mujica ku ta hungando segunda base tabata den gran forma na bate bayendo di 3-3. Wild Cats a sali nota 2 kareda den promé inning kontra di Shair Lacrus i despues bai ariba 4-1, 5-1. Santa Maria a yega basta serka 5-4 den di 7 inning, pero Wild cats ta nota 1 kareda den di 8 inning i dos den di 9 inning pa habri e skor un tiki. Santa Maria a dal dos homerun, Tilsaimy Melfor den promé inning ku base bashi i Darren Seferina di dos kareda den di 6 inning. E wega a kaba kayente ku Santa Maria ku kareda di empate na home-plate. E batiadó Sherman Lacrus a poncha kanta pa terminá e wega.
NUMERITONAN
Wild Cats a nota 8 kareda, bati 10 hit i hunga sin kometé eror. Risandro Pastor a gana i Shurendell Mujica a bati di 3-3. Raycheron Michel a bati di 1-1 ku 2RBI.Carlton Daal di 5-2 i Randy Kirindongo di 4-2.
Santa Maria a skor na 6 okashon bati 7 hit i hasi 5 eror. Shair Lacrus tabata e picher pèrdèdó i Sander Boeldak a bati di 2-2. Tilsaimy Melfor i Darren Seferina a bati homerun.
