Djadumingu 6’or pm wega number 6
Wild Cats ta laga Santa Rosa den tereno i seri ta bira 2-3
WILLEMSTAD- Terrence Josephina ku base por bola riba konteo di 3-1 den di 9 inning, ta nota kareda number 6 pa Wild Cats gana ku skor di 6-5 di Santa Rosa Indians. E wega a tuma lugá na Tio Daou Ballpark i wega number 6 lo ta den mesun parke pa 6’or pm djadumingu 11 di òktober. E picher slengu di Wild Cats Kennimar Leocadia tabata klave den relevo pa Wild Cats tirando 4 inning i 1 tersio tumando solamente un kareda ( un kareda shushi porsierto) pa bira e picher ganadó. Jordan Lucas ku a tira 8.2 inning balente a resultá e picher pèrdèdó.
Un wega kargá ku emoshon kaminda Wild Cats a pika dilanti 1-0 den bòm di promé inning riba flai di sakrifisio di Daytan Biegel. Den kabes di e di dos inning, Ildion Martina ta dal doblete pa empuhá Rochendrik Alexander ku a kore for di primera te home. Ildion Martina kier a alargá e doblete pa tripel pero ta resultá out na tersera. Den di 3 inning Santa Rosa ta bai ariba ku skor di 2-1 riba wild pitch. Riordan Windster ku tabata na tersera ta skor riba wild pitch. Wild Cats ta bolbe empatá, e biaha aki e wega ta bira 2-2 na momentu ku Yurendell de Caster bati hit pa left i Rojean Cleofa ta skor. Santa Rosa ta nota un kareda i bai ariba 3-2 riba hugada kaminda Jurgen Statie a bati pa double play. Santa Rosa tabatin base yen sin out den e inning aki (inning number 4) i ta nota solamente un kareda pa ariba 3-2. Den bòm di di 4 inning Shurendell Mujica ta bati homerun di 3 kareda pa Wild Cats bai ariba 5-3.
Den di 5 inning Riordan Windster ta pone toke di sorpresa i yega te segunda despues ku e tersera base Yurendell de Caster a tira malu primera. Riordan Windster ta roba tersera i anotá kareda number 4 pa Santa Rosa riba bataso pa short konektá pa Aldair Daal. Inningnan 6 i 7 ta bai sin anotashon i Wild Cats ta keda ariba 5-4. Den kabes di e di 8 inning e wega ta empatá na 5 riba un eror en tiru di e kècher Reagelo Beaumont di Wild Cats.
Tabatin koredó na primera i tersera i Beaumont a opta pa tira segunda pa trata na saka e di tres out i e tiru ta resultá den centerfield. Santa Rosa ta bai 1, 2, 3 den kabes di e di 9 inning. Wild Cats ta embasá dos koredó den di 9 inning, toka i avansá e dos koredónan pa tersera i segunda. Santa Rosa ta bolia e batiadó Randy Kirindongo intenshonal pa yena base. Ku base yen Levi Carolus ta bati rolling pa picher kaminda e picher ta tira home i saka force out. Riba konteo di 3-1 e batiadó Terrence Josephina ta risibí base por bola ku base yen pa final di e wega. Wild Cats ta laga Santa Rosa den tereno i forsa wega number 6 djadumingu 6’or pm den Tio Daou Ballpark.
NUMERITONAN
Wild Cats a nota 6 kareda, dal 12 hit i kometé 4 eror. Kennimar Leocadia a gana. E hóbennan Klevert Martina (3.0 inning ) i Joharvy Martinez (1.2 inning) a mira akshon komo picher. Shurendell Mujica a bati di 4-3. Terrence Josephina di 4-2, Rojean Cleofa di 4-2 i Calten Daal di 5-2. Shurendell Mujica a dal un homerun. Santa Rosa a skor na 5 okashon, dal 7 hit i hunga sin eror. Jordan Lucas tabata e picher pèrdèdó. Ela tira 8 inning i dos tersio i risibí relevo di Hershelon Juliana ku a tira 0.2 inning. Shakir Albert i Rochendrik Alexander a bati di 4-2.
