Yesterday ta sorprendé Quality Stars den Beisbòl Veterano
WILLEMSTAD- Yesterday ku ta luchando pa klasifiká a dal Quality Stars ku skor di 5-3 den Beisbòl Veterano. E picher di Yesterday Myson Cathalina a habri i tira 4 inning bon pa despues Andley Simmons saka e último 3 outnan pa terminá e wega ku a bai 5 inning.
Yesterday a kometé 6 eror, pero a logra gana e wega tòg. Gerald Gregorius ku a habri e wega pa Quality Stars a tira 0.2 inning i tuma 5 kareda di kual 3 tabata limpi. Ku e derota di Quality Stars i viktoria di Santa Maria riba Otrabanda, Quality Stars i Santa Maria ta empatá na promé lugá den Beisbòl Veterano ku rèkòrt di 13-2. Pa loke ta e otro weganan wikènt pasá, Santa Maria Pirates a gana di Otrabanda pèrtá 3-1. Santa Rosa Memories a gana Jandoret Raiders 9-1.
Broncos a nòkout Marlins 15-2 i Isla Crackers a gana Azucar 9 pa 7. Wikènt benidero ta Jandoret Raiders vs Yesterday, Quality Stars kontra di Santa Rosa i Santa Maria kontra Broncos.
Marlins a laga Pitufos den tereno den Sòftbòl Liga 50
WILLEMSTAD- Marlins riba hit di Irving ‘Skippy’ Sambo a laga Pitufos den tereno. E wega a tuma lugá djasabra 14 di sèptèmber na Van Engelen Ballpark. Ku e viktoria aki Marlins ta keda na promé lugá miéntras Pitufos ta bai na di 3 lugá. Ekipo Jaws ku viktoria di 14-0 riba Sluggers ta pasa pa okupá puesto number 2 den Liga 50.
Jaws tin 8 wega ganá sigí i Marlins tin 11 wega sigí ganá. Ban Serio i Catpower tin dos wega ganá sigí, otro ekiponan ta den racha pèrdèdó. Den otro weganan Ban Serio a dal Artemisia 17 pa 4 i Catpower a derotá Lions 5 pa 2. Standing up to date ta Marlins 12-2, Jaws 11-3, Pitufos 10-4, Ban Serio 8-5, Baranka/Sharks 8-7, Flamboyan/Gamers 7-7, Sluggers 6-8, Catpower 4-10, Artemisia 3-10 i Lions 1-14.
MAS INFORMASHON DI SÒFTBÒL I BEISBÒ
L
Fanátikonan di Deporte Kòrsou bonochi. Awe nos ta start ku detayenan di Liga 50 i Beisbòl Veterano ku a tuma lugá den fin di siman. Ekipo Marlins di Liga 50 Sòftbòl a laga Pitufos den tereno ganando ku skor di 7 pa 6. Marlins tabata kómodo dilanti den e wega, pero Pitufos ta rèli pa 6 kareda den di 6 inning pa empatá e wega na 6. Den di 7 inning e dos ekiponan no a nota kareda i den di 8 inning (Tie Break) Pitufos komo bishitante no ta nota kareda i Marlins ta nota kareda di gana riba hit di Irving ‘Skippy’ Sambo. Pa loke ta trata Beisbòl Veterano ekipo Yesterday a zona un kampanaso riba Quality Stars ganando ku skor di 5 pa 3.
* * * * *
Ban pa Beisbòl Dòbel A. Ekipo Royal Scorpions a gana di dos wega di seri semi-final kontra di Groot Kwartier djasabra anochi. E wega a terminá ku skor feros 12 pa 2 pa Royal Scorpions ku ta rumbo pa nan di dos final i di dos título sigí den Beisbòl Dòbel A. Hopi estrea den e tim i pa kolmo nan a haña Swindley Lint for di Santa Rosa den e draft di djamars siman pasá. Un hungadó kompletu ku por bati, bati pa poder, filea, kore, tira i picha tambe. Ke mèn 6 -tool di nos Beisbòl Dòbel A. Lint a hunga den left pa ekipo Royal Scorpions djasabra pa despues bin picha. Un hungadó ku por a yega hopi leu den Beisbòl profeshonal ku a bai High School/ College na USA. Lint a bai di 5-2 i 2 kareda empuhá djasabra, ela picha 2 tersio di inning sin duna kareda.
* * * * *
Djadumingu anochi Santa Maria a bolbe gana di Wild Cats i laganan lomba kontra muraya. Santa Maria. Santa Maria a gana wega number 1 ku skor pèrtá di 5-4. Seri kandela mes mes i naturalmente muchu mas kompetitivo ku e seri entre Groot Kwartier i Royal Scorpions. E ekipo Royal Scorpions tin profundidat mes mes riba tur nivel. Nan a terminá number 1 di kampionato regular i ta faborito pa ripití e título, ánke tur kos por pasa den serianan kòrtiku. Si den e seri un ekipo ta sende riba tur area, esta picheo, defensa, bateo, korementu di base, aktitut, stail di hopi gana pa truimfá den e wega, ta bira fèrfelu. Pa loke ta trata e timnan ariba den e standing di buelta regular, tur por gana otro kualke dia. Djamars Royal Scorpion stabata gana fasil 6 pa 1 i tabata rumbo pa swip Groot Kwartier.
* * * * *
Bèk pa Liga 50 di Sòftbòl. Djasabra Jaws a gana Sluggers ku skor di 14-0. E wega tabata 2-0 i despues 3-0 te den komienso di e di 6 inning. Den di 6 inning ekipo Jaws a logra nota 11 kareda pa bin gana 14-0. Bakker a dominá e wega basta bon te den di 5 inning. Joel Angelista a dal homerun pa Jaws. E aña aki no tin masha homerun den 50+. Fernando Rosario tabata hermétiko atrobe pa Jaws, tirando 6 inning di blankeo i a tuma solamente 5 hit. Ban Serio a dal Artemisia duru 17-4. Ramon Cabrera ku ta un picher ku ta tira Beisbòl i Sòftbòl stail di djariba djabou (Dodo Kima e Momo, Carlos Coffie), a gana fásil pa ekipo Ban Serio. Erling ‘Pacheco’ Gosepa a sigi den bon forma kayente di 2-2 komo leftfielder i rightfielder.
* * * * *
Catpower a gana Lions den un wega pèrtá. Luis Alcantara (Baby) a gana pa Catpower i bati di 2-2. Eran Neuman dirigente di Little League a bati di 3-3. Marlins ta nan so den kabes ku rèkòrt di 12-2, Jaws 11-3, Pitufos 10-4, Ban Serio 8-5, Baranka/Sharks 8-7, Flamboyan/Gamers 7-7, Sluggers 6-8, Catpower 4-10, Artemisia 3-10 i Lions 1-14. Nos tabata pendiente pa resultadonan di Liga 60 ku a tuma lugá ayera na Frank Curiel Ballpark. Bèk un ratu pa Beisbòl Veterano. Quality Stars i Santa Maria ta empatá den kabes di Beisbòl Veterano ku rèkòrt di 13-2, ta sigi Isla Crackers ku 11-3, Santa Rosa Memories ku 11-4. Yesterday 8-6, Broncos 8-7, Jandoret 5-10, Otrabanda 4-11, Azucar 3-12, Marlins 3-12, Flamingos 0-10. Nos ta keda te aki pa awe i te djarason ku Poder di Dios.
