WILLEMSTAD- E veteranísimo super estrea di Beisbòl Dòbel A Yurendell De Caster ta gente liber parse i ta rumbo pa Royal Scorpions. Tin indikashon ku ekipo Santa Maria Pirates tambe tin interes den Yurendell De Caster. Algún aña pasá Yurendell a hunga un pa dos temporada den Santa Maria Pirates. Parse ku no tabatin muchu moveshon di Wild Cats pa keda ku Yurendell De Caster.
Yurendell De Caster agente liber rumbo pa Royal Scorpions. Santa Maria tambe ta negoshando.
E otro tersera base di Wild Cats ku ta Terrence Josephina tambe ta agente liber. No tin masha negosashon entre Terrence Josephina i Wild Cats. Terrence Josephina a bati pa .231 ku 2 homerun i 8 RBI den 2021 den ekipo kampion Wild Cats. 2020 Terrence a bati pa average .338. Tantu Yurendell De Caster komo Terrence Josephina ta èks profeshonalnan ku organisashon di MLB. Yurendell a hunga algún wega den Big League ku Pittsburg Pirates. Aña pasá Yurendell a bati .276 ku 3 homerun i 29 RBI. Aña 2020 Yurendell a bati pa un average di .318. Wild Cats tin interes den Urlich Snijders ku a pidi retiro di Santa Maria i deklará su mes agente liber. Wild Cats ta duru riba e picher Keorden Leito, un prospekto grandi slengu ku semper a tira bon den su karera di Little League.
DENNIS GUSTINA
Parse ku Dennis Gustina a firma ku Royal Scorpions e siman aki. No tabatin nada ofishal ainda, pero Dennis talentoso centerfielder di nos Beisbòl Dòbel A, lo keda 3 aña mas ku ekipo Royal Scorpions serka Mompy van Gurp, ku tabata su manager den ekipo Santa Maria Pirates.
Little League ta sigi e wikènt aki den tur liga i divishon
WILLEMSTAD- Little League Beisbòl ta sigi e wikènt aki ku weganan den tur liga. Despues ku a reaunudá e kampionato dos siman pasá, promé biaha lo tin wega den tur divishon riba e parkenan kustumbrá rònt Kòrsou. Awe nos tin mas resultado di weganan di siman pasá.
RESULTADONAN
Djadumingu 13 di febrüari
MINOR LEAGUE
Sta Maria(1) 6, Sta Maria(2) 6
E wega aki a resultá den un empate. Sta Maria(1) a bati 7 hit i nan a kometé 1 eror. Jayvery Felicia a bai di 1-1. Sta Maria(2) tabatin 5 hit ku 1 eror. Jozaindy Balentina a bai di 1-1.
Van Engelen 15, Koraal Specht 3
Van Engelen tabatin 9 hit ku 1 eror. Mathew Naaldijk a gana. Odin Pietersz a bai di 3-3 ku 1 homerun. Pa Koraal Specht 2 hit ku 2 eror. Phali Jeanlouis a pèrdè. Andres Fernandez a bai di 1-1.
Marchena(1) 14, Monte Carmelo(1) 0
Marchena(1) a dal 9 hit i hunga sin eror. Jayvin Florentina tabata picher ganadó i Ky Mahni Thomassa a bai di 2-2. Monte Carmelo(1) no tabatin hit i nan a hasi 3 eror. Jeffrey Delice Cafsia a resultá pèrdèdó.
St Michiel 6, Tera Cora 5
St Michiel a dal 3 hit i nan a kometé 2 eror. Darwin Blanquicett Gonzalez a gana. Frank David Moron Clara a bai di 2-2. Pa Tera Cora 2 hit ku 1 eror. Adrion van Putten a pèrdè. D’one Eugenio a bai di 1-1.
LITTLE LEAGUE
Van Engelen 10, Koraal Specht 0
Van Engelen tabatin 6 hit ku 1 eror. Nasir El Ossais tabata ganadó. Jaydon Candelaria a bai di 1-1. Koraal Specht a dal 1 hit i nan a hasi 4 eror. Bjorn Rodriguez a pèrdè. Dishairo Antersijn a bai di 1-1.
Marchena 6, Jandoret 0
Marchena a dal 8 hit i nan a hunga sin eror. Jaythan Cordilia a gana. Dyveneau Zimmerman a bai di 2-2. Jandoret no tabatin hit i nan a hasi 2 eror. Chaldimar Cijntje a bai di 1-1.
Sta Maria(1) 9, Sta Maria(2) 6
Sta Maria(1) tabatin 9 hit i nan a kometé 4 eror. Jaydlynn Wiel a gana. Emery Hansen a bai di 2-2. Sta Maria(2) a dal 10 hit i nan a hasi 1 eror. Amir El Ayoubi a pèrdè. D’Shawn Winklaar a bai di 3-3.
JUNIOR LEAGUE
Sta Maria(2) 7, Jandoret 0
Jandoret a pèrdè pa defolt!
Marchena(2) 9, St. Michiel 6
Marchena(2) a dal 6 hit i nan a kometé 4 eror. Farid Cijntje tabata ganadó. Sebastiaan Russo a bai di 1-1. Pa St Michiel 6 hit ku 4 eror. Edwald Hersilia a resultá pèrdèdó. Roshendrick Jansen a bai di 2-2.
Marchena(1) 5, Sta Maria(1) 3
Marchena(1) tabatin 3 hit ku 1 eror. Isaac Acosta a gana. Rigeadon Raap a bai di 2-2. Sta Maria(1) tabatin 5 hit ku 3 eror. Justin Coffie a pèrdè. Jayden Mulder a bai di 1-1.
Alexander Provacia jr. shòrtstòp/segunda base/picher di Marchena Little League. Ela tira no hit no run djasabra 19 di februari.
INFORMASHON DI BEISBÒL I SÒFTBÒL
Lesadónan di Deporte Korsou. Gobièrnu a anunsiá ku a habri kasi kompletu ku algun restrikshon. Ke mèn, deportista por kuminsá move, por sigi train p’asina por start kampionatonan i torneonan ku tin pendiente. Den dianan benidero nos lo risibí notifikashon i komunikadonan di federashon i ekiponan ku lo ranka sali formal. Awe ta start ku The Diamond Stars League na Sam Bunting Ballpark. Pa 7’or pm lo tin un apertura ofishal sigí pa e promé wega ku ta entre ekiponan Mas Goso i The Fighters pa 7.30’or. Djasabra pa 7.30’or pm tin wega entre Rising Trotters i Lady G. Den edishon di djaluna nos tin detayenan di kon a bai ku apertura i e weganan di wikènt.
* * * * *
Awe nos tin mas resultado di Beisbòl Little League ku a tuma lugá siman pasá. Beisbòl Minor, Little, Junior i Senior ta sigi tantu den Liga Pariba komo den Liga Pabou na e terenonan kustumbrá kaminda tin Beisbòl Little Legaue. Frank Curiel Ballpark, Jandoret Ballpark, Shon Ki Nicasia Ballpark i Suffisant. Pariba weganan ta na Tio Daou Ballpark, Montab Ballpark, Ricardo Elhage Ballpark. Otro siman nos lo tin resultado naturalmente. Fanátikonan por yega stadion i parkenan trankil. Kòrda kuida tòg debí ku nos no a yega kaminda nos mester yega ainda.
* * * * *
Ekiponan di Beisbòl Dòbel A ta tirando bara di hak den awa di Wild Cats. Mester bisa ku Wild Cats a move pisá den off season, pero nan tin algún hungadó ku ta liber i parse ku no tin masha negosashon. E veteranísimo super star ketu bai Yurendell Decaster ta liber, pero no tin masha negosashon. Aya banda Royal Scorpions i ekipo Santa Maria ta duru riba Decaster ku Royal Scorpions ku un bentahe leve. Terrence Josephina tambe ta liber i no tin masha negosashon. Otro informashon ta indikando ku Wild Cats lo keda tras di tantu Ruderly Manuel komo Temesh Lourens ku ta sali huntu 9000 florin.
* * * * *
Djarason awor Swift ta selebrá 50 aña di eksistensia i lo selebrá mesun dia ku un Santo Sakrifisio di Misa sigí pa un resepshon. 50 aña konsekutivo den Slowpitch anto eksitoso no ta wega. Swift a keda ku su formashon den Liga van Engelen i Liga 40. Swift di un manera òf otro no a djoin Liga 50 nunka. Por ta aworaki ku Liga 50 ta tuma lugá na Van Engelen Ballpark no ta mal idea pa Swift djoin Liga 50 tambe. Djarason awor lo ta un selebrashon super spesial. Ekiponan ku hopi aña den Slowpitch manera Swift ku a keda aktivo sin stòp ta Cicoza i Jaws. Jaws tin ekipo riba nivelnan di hóbennan, 40, 50 i 60.
* * * * *
Saludo pa Gai Lihe Barbolina, fanátiko number 1 di Royal Scorpions. Pa basta tempu Boy Motor tabata fanátiko number 1, pero debí na edat Boy a stòp di bai wega i laga e animashon den man di Gai Lihe, Anthony Zimmerman, Rigmar Domatilia, ets., ku tei na kasi tur wega. Tras di kortina tin grandinan manera Sherwin Casper i Ryan Isebia. E siman ku a pasa Royal Scorpions a firma un grandi. Dennis Gustina Jr. Un dje gran outfieldernan pa hopi aña den Dòbel A a firma ku Royal Scorpions. Tin mas na kaminda pa Royal Scorpions manera nos a pone den e kolumna aki.
* * * * *
Moveshonnan ta sigi pa e torneo komersial organisá pa e Fundashon SIPS di Polis. E torneo lo tuma lugá dianan 4, 5, 11 i 12 di yüni den Stadion Post 6. E torneo yama Sòftbòl Komersial 40+ (Veterano). Pa otro siman kompaníanan lo kuminsá haña invitashon. Dor ku ta promé biaha, SIPS a invitá solamente 8 ekipo. Esnan ku inskribí promé ta bebe awa limpi. Nos a pone algún kandidato fuerte pa kompetí ku ta Polis, Aqualectra, MCB, Isla (Crackers), Flow, MCB, SBAB/Ontvanger, SDKK, Douane ets. Keda pendiente pa mas detaye. Polis ta klá, debí ku tin un ekipo di 40+ for di 2020 formá, pero ku no por a move debí ku a bini e pandemia COVID-19 mesun aña i despues na 2021. Den novèmber SIPS a organisá un torneo i tabatin basta Polis ku talento skondi ku a presentá i hunga bon bala. Nos ta keda te aki.
